दाङका संगीतकार श्रेष्ठले पाए दोस्रो पटक ‘गिनिज बुक अफ वर्ल्ड रेकर्ड’ प्रमाणपत्र
काठमाडौँ। दाङ स्थायी घर भएका संगीतकार सन्तोष श्रेष्ठले दोस्रो पटक गिनिज बुक अफ वर्ल्ड रेकर्डको प्रमाणपत्र हात पारेका छन् ।
विश्वको सबैभन्दा अग्लो स्थानमा प्रत्यक्ष रुपमा वाद्यवादन सहितको गायन तथा म्युजिक भिडियो छायांकन गरिएको गीत ‘तिलिचो ताल’बाट श्रेष्ठले दोस्रो पटठक गिनिज बुक अफ वर्ल्ड रेकर्डको प्रमाणपत्र पाएका हुन् ।
यसअघि पहिलो पटक ५० देशका ५० भाषामा संगीतबद्ध गरिएको ‘ढुकढुकी भित्र तिम्रो’ गीतबाट प्रमाणपत्र पाइसकेका छन्। दुवै गीतका रचनाकार डा. डी.आर. उपाध्याय हुन्।
‘तिलिचो ताल’ बोलको गीत श्रेष्ठको संगीत र सागर अधिकारीको स्वरमा छ । सो टिमलाई राष्ट्रपति रामचन्द्र पौडेलले शीतल निवासमा गत शुक्रबार आयोजित कार्यक्रममा गिनिज बुक अफ वर्ल्ड रेकर्डको प्रमाणपत्र हस्तान्तरण का हुन् ।
‘गीत मनाङ जिल्लास्थित तिलिचो तालभन्दा केही माथि (५ हजार १०५ मिटर उचाइ) मा प्रत्यक्ष रुपमा वाद्यवादन सहितको गायन, रेकर्डिङ र छायांकन गरिएको थियो ।
यो विधामा २०७६ असोज १० गते ४ हजार ७६८ मिटर उचाइमा माधव खरेल लगायतको समूहले पहिलोपटक कीर्तिमान राखेको थियो । यसको दुई वर्ष अगाडि सन्चबहादुर राई लगायतको समूहले ४ हजार ८१३ मिटर उचाइमा रेकर्ड र छायांकन गरेर खरेल समूहको कीर्तिमान भंग गरेको थियो ।
गत २०७९ वैशाख ९ गते ५ हजार १०५ मिटर (१६ हजार ७४८ फिट २ इन्च) उचाइमा ‘तिलिचो ताल’ बोलको गीतलाई रेकर्डिङ र छायांकन गरेर नयाँ विश्व रेकर्ड कायम गरिएको हो।
महेन्द्र चन्द ‘माइकल’को निर्देशन रहेको गीतको दृश्यमा पुष्प खड्का र श्रद्धा क्षेत्रीको अभिनय छ । गीतको छायांकन उत्सव दाहालले र सम्पादन सिलन लम्सालले गरेका छन् ।
श्रेष्ठ संगीत र बाद्यवाधनमा लोकप्रिय छन्।
