नेपालका लागि चिनियाँ राजदूत सोङद्वारा प्रधानसम्पादक बुढाथोकीलाई सामाजिक सञ्जालमा धम्की
काठमाडौं । नेपालका लागि चिनियाँ राजदूत छन् सोङले टक्सार मिडिया ग्रुपका प्रधान सम्पादक गजेन्द्र बुढाथोकीलाई धम्की दिएका छन् ।
प्रधान सम्पादक बुढाथोकीले पोखरा विमानस्थल निर्माणका लागि लिइएको ऋण सम्बन्धमा सामाजिक सञ्जाल ‘एक्स’मा पोष्ट गरेको विवरणलाई लिएर राजदूत सोङ्ले धम्कीयुक्त भाषामा ‘रिप्लाइ’ गरेका हुन् ।
प्रधानसम्पादक बुढाथोकीले दुई दिनअघि ‘पोखरा विमानस्थलका लागि लिएको ऋण २ प्रतिशत ब्याजदरको भन्दै आएका थिए । ५ प्रतिशत पो रहेछ’ भन्दै पोस्ट गरेका थिए ।
बुढाथोकीको पोस्टमा मङ्गलबार राति रिप्लाइ गर्दै राजदूत सोङले अहिलेसम्म आफूले देखेको सबैभन्दा ठुलो झुट भएको टिप्पणी गरेका छन् । उनले लेखेका छन्,“यो सार्वजनिक सूचना हो, तैपनि यसबारे झुट बोल्ने आँट गर्नुभयो ।”
राजदूत सोङले आफूहरूले बुढाथोकी र उनले प्रतिनिधित्व गर्ने (व्यक्ति/संस्था) बाट पनि औपचारिक माफीको माग गरेको गरेका छन् ।
प्रधानसम्पादक बुढाथोकीले आफूले प्रमाणसहित आफूले म्यागेजिन(टक्सार म्यागजिन)मा प्रकाशित गर्ने पनि बताएका छन् । पोखरा विमानस्थल निर्माण गर्न नेपाल सरकारले चीनको एक्सपोर्ट इम्पोर्ट बैंकबाट आरएमबी १ अर्ब ३७ करोड ८७ लाख ऋण प्राप्त गरी ५ प्रतिशत ब्याज तिर्ने गरी नेपाल नागरिक उड्डयन प्राधिकरणलाई उपलब्ध गराएको छ ।
उक्त ऋण मध्ये २ करोड १० लाख रुपैयाँ सावाँ फिर्ता भई १९ अर्ब ३० करोड ४३ लाख रुपैयाँ बाँकी छ । सरकारको यो विवरणले ५ प्रतिशत ब्याजदरमा ऋण लिइएको देखिए पनि २ प्रतिशत दरमा मात्र लिइएको भनिएको छ ।
