भैरहवाबाट जनकपुरतर्फ जाँदै गरेको बस सर्लाहीमा दुर्घटना, ३ जनाको मृत्यु
सर्लाही । रुपन्देहीबाट जनकपुर जाँदै गरेको बस सर्लाहीमा दुर्घटना हुँदा ३ जनाको मृत्यु भएको छ ।
सर्लाहीको बागमती नगरपालिकास्थित रायमाझी चोकमा आज बिहान भएको सवारी दुर्घटनामा तीन जनाको मृत्यु भएको हो । दुर्घटनामा अन्य १७ जना घाइते भएका छन् ।
रुपन्देहीबाट जनकपुरतर्फ आउँदै गरेको लु १ ख ८८४८ नम्बरको रात्रि बस पूर्वपश्चिम राजमार्गस्थित बागमती नगरपालिक–११, रायमाझी चोकमा रोकेर राखेको ट्रकमा ठोक्किँदा रुपन्देहीको मायादेवी गाउँपालिका निवासी हरिबहादुर चौधरी, ८५ वर्षका दशरथ कोहार र ५० वर्षका रामकरण केवटको मृत्यु भएको प्रहरीले जनाएको छ ।
दर्घटनामा घाइते भएका तीनै जनालाई घटनालगत्तै उद्धार गरी हरिवनस्थित नमूना अस्पताल पुर्याएकामा चिकित्सकले मृत घोषणा गरेका थिए । बसमा ४० जना यात्रु रहेका प्रहरीले जनाएको छ ।
दुर्घटनामा गम्भीर घाइते भएकाहरुको जनकपुर, वीरगञ्ज तथा स्थानीय अस्पतालमा उपचार भइरहेको छ ।
