रोल्पाको माडीमा जिप दुर्घटना, आठको मृत्यु
लिवाङ । रोल्पाको घर्तीगाउँबाट तालावाङतर्फ जाँदै गरेको जिप दुर्घटनामा परेको छ । दुर्घटनामा परेर ८ जनाको मृत्यु भएको जनाइएकाे छ।
पाँच जना गम्भीर घाइते भएकाे प्रारम्भिक जानकारी प्राप्त भएकाे छ। घाइतेकाे घर्तीगाउँ अस्पतालमा उपचार भइरहेकाे छ।
लु १ ज ३२५२ नम्बरको जिप माडी गाउँपालिका वडा नं. ४ स्थित परेवा छहरामा करिब ४०० मिटर तल खसेको दुर्घटना लगत्तै घटनास्थल पुगेका माडी गाउँपालिकाका प्रेस सल्लाहकार तथा पत्रकार वुद्धिमान ओलीले जनाएका छन् ।
घटनाको पूर्ण विवरण भने आइसकेको छैन । दुर्घटनाको कारण, मृत्यु र घाइतेको सनाखतसमेतका विवरण लगायतका विषयमा अनुसन्धान भइरहेको प्रहरीेले जनाएको छ ।
पहिरो झदै गरेको अवस्थामा ड्राइभरले गाडि रोकेर पहिरो हेर्न जाँदा गाडि पछाडि सरेको र ड्राइभरले ब्रेक लगाउन जाँदा गाडि बाटोदेखि तल झरेको प्रारम्भिक जानकारी प्राप्त भएको ओलीले बताए।
तस्बिरः वुद्धिमान ओली
