२० करोड रुपैयाँ बराबरको लागुऔषधसहित विदेशी नागरिक पक्राउ

काठमाडौँ । ठूलो परिमाणको लागुऔषध कोकिनसहित एक विदेशी महिलालाई प्रहरीले काठमाडौँको ठमेलबाट पक्राउ गरेको छ । प्रहरीले ठमेलमा लागुऔषधको कारोबार भइरहेको सूचना पाएपछि ठमेलस्थित काठमाडौँ सिटी होटलमा छापा मारेको थियो ।

सिटी होटलको ती महिला बसेको कोठाबाट प्रहरीले ५ किलो ८२० ग्राम कोकिन फेला पारेको हो । सो कोकिनको बजारमूल्य २० करोड ३७ लाख रुपैयाँ बराबर रहेको प्रहरीले जनाएको छ ।

जिल्ला प्रहरी परिसर काठमाडौँको विशेष प्रहरी टोली र प्रहरी वृत्त लैनचौरको संयुक्त टोलीले ६ वटा स्कुल ब्यागमा फल्स बटन बनाएर लुकाइएको सो कोकिन फेला पारेको हो ।

प्रहरीले मलेसियाको जोहोरकी ४७ वर्षीया बाथामुलाई भाडिभालो नामकी महिलालाई नियन्त्रणमा लिइएर अनुसन्धान अगाडि बढाएको छ ।