बाढीले घर बगाउँदा रुकुम पश्चिममा ३ बालिकाको मृत्यु

रुकुम । रुकुम पश्चिममा मध्यराति आएको बाढीले घर बगाउँदा ३ जना बालिकाको मृत्यु भएको छ। एक जना बाढीमा बेपत्ता भएका छन्।

सोमबार राति अविरल वर्षापछि आएको बाढीले घर बगाउँदा सुतिरहेका तीनजना बालिकाको मृत्यु भएको हो।

मृत्यु हुनेमा आठबिसकोट नगरपालिका- १२ का ८ वर्षीया हितमाया पुन, ५ वर्षीया धनिसा पुन र ४ वर्षीया मनिषा सार्की रहेका नगर प्रमुख रवि केसीले जानकारी दिए।

सोही ठाँउमा बाढीले बगाउँदा सात जना घाइते भएका छन् । घाइते हुनेमा १० वर्षीय विजय सार्की, २२ वर्षीया अनिसा पुन, २९ वर्षीय जनक खत्री, ६५ वर्षीया मनसरी पुन, ४ वर्षीय मेक्सन पुन, २० वर्षीया धनमाया पुन र ६५ वर्षीया कल्पना कामी रहेको नगर प्रमुख रवि केसीले जानकारी दिए।

घाइतेहरुको उपचार भइरहेको छ भने मृतकहरुको शव निकाल्ने प्रयास भइरहेको नगर प्रमुख केसीले बताए ।