टेलिकमको ग्राहक सेवा नम्बरमार्फत एफटिटिएच इन्टरनेट सेवाका प्याकेजहरू परिवर्तन गर्न सकिने
![](https://i0.wp.com/www.lumbinisanchar.com/wp-content/uploads/2021/11/Nepal-Telecom-Ntc.jpg?fit=1500%2C825&ssl=1)
काठमाडौँ । नेपाल टेलिकमले ग्राहक सेवा नम्बर १९८ मार्फत उच्च गतिको फाइबर टु द होम (एफटिटिएच) इन्टरनेट सेवाका प्याकेजहरु परिवर्तन गर्न सकिने सुविधा थप गरेको छ ।
नेपाल टेलिकमको मोबाइल तथा टेलिफोन सेवा प्रयोगकर्ताले १९८ मा डायल गरी फाइबर टु द होम (एफटिटिएच) जडान अनुरोध दर्ता गर्ने देखि आफ्नो आवश्यकता अनुसारका (एफटिटिएच) सेवाका प्याकेजहरु परिवर्तन समेत गर्न सक्ने जनाएको छ ।
यसैगरी नेपाल टेलिकमले सोही ग्राहक सेवा नम्बर १९८ मार्फत आफ्ना टेलिभिजन सेवा (एनटिभि)का ग्राहकहरुका लागि आफ्नो आवश्यकता अनुसार आलाकार्टा शुल्क प्रणाली बमोजिमका बेसिक तथा प्रिमियम प्याकेज खरिद गर्न सकिने व्यबस्था गरेको छ । कम्पनीका अनुसार ग्राहकले १९८ डायल गरी आलाकार्टा प्रणालीका टेलिभिजन प्याकेजहरु सब्सक्रिप्सन गर्नका साथै प्याकेज परिवर्तन पनि गर्न सक्नेछन् ।
यस सेवा सञ्चालनसँगै एफटिटिएच सेवाका प्याकेज परिवर्तनका लागि नेपाल टेलिकमको काउन्टर सम्म पुग्नुपर्ने अवस्थाको अन्त्य भई ग्राहकको समय तथा श्रमको बचत हुने विश्वास कम्पनीको रहेको छ ।