गोरखामा पहिरोले घर बगाउँदा ५ जना बेपत्ता

गोरखा । गोरखामा गएराति पहिरोले घर पुरिँदा एकै परिवारका तीनसहित ५ जना बेपत्ता भएका छन्।

आइतवार बिहान करिब तीन बजे उत्तरी गोरखाको धार्चे गाउँपालिका-५ रेसेफाँटमा पहिरो जाँदा स्थानीय जीतबहादुर गुरुङको एक घर र कृषि फर्म पहिरोले बगाएको थियो ।

पहिरोले पुरिएर जीतबहादुरसहित उनकी श्रीमती ३५ वर्षीय कान्छी माया र ६० वर्षीया बुबा सुलाल कान्छा बेपत्ता भएका छन् ।

त्यस्तै सोही वडास्थित सिङ्लाका ३३ वर्षीय रमेश गुरुङ र ठेगाना नखुलेका ३४ वर्षीय रमेश परियार बेपत्ता रहेको जिल्ला प्रहरी कार्यालय गोरखाले जनाएको छ । उनीहरु २ जना हाइड्रोका कामदार हुन्।

पहिरोमा परेका अन्य दुई जनालाई भने घाइते अवस्थामा उद्धार गरिएको छ । उद्धार हुनेमा सिङ्लाका ३५ वर्षीय दिलिप गुरुङ र २७ वर्षीय थमबहादुर गुरुङ रहेका छन् ।