गोसाइँकुण्डमा पहिलोपटक पुग्यो राष्ट्रिय ग्रिडको बिजुली
काठमाडौँ । धार्मिकस्थल रसुवाको गोसाइँकुण्डमा पहिलोपटक राष्ट्रिय प्रसारण लाइनको बिजुली पुगेको छ । यसबाट गोसाइँकुण्ड पुग्ने तीर्थयात्रीलाई सहज हुने भएको छ ।
ग्रामीण र दुर्गम क्षेत्रमा लगातार विद्युत् सेवा उपलब्ध गराउँदै आएको नेपाल विद्युत् प्राधिकरणले पहिलोपटक गोसाइँकुण्डमा बिजुली पुर्याएपछि स्थानीयका अलावा तीर्थयात्रीलाई राहत पुगेको हो । प्राधिकरणले समुद्र सतहबाट चार हजार तीन सय ८० मिटर उचाइमा रहेको गोसाइँकुण्डमा शुक्रबार साँझदेखि ग्रिडको विद्युत् पुर्याइएको जनाएको छ।
धार्मिक एवं पर्यटकीय गन्तव्य गोसाइँकुण्डमा जनै पूर्णिमाका दिन लाग्ने मेलाको पूर्वसन्ध्यामा राष्ट्रिय प्रसारण लाइनको विद्युत् पुर्याइएको प्राधिकरणका कार्यकारी निर्देशक कुलमान घिसिङले बताए ।
रसुवाको सदरमुकामबाट गोसाइँकुण्डतर्फ जाने बाटोमा पर्ने चन्दनबारीसम्म यसअघि नै राष्ट्रिय ग्रिड पुगेको थियो ।चन्दनबारीबाट करिब आठ किलोमिटर ११ केभी लाइन लाङटाङ राष्ट्रिय निकुञ्ज क्षेत्र हुँदै गोसाइँकुण्डमा पुर्याइएको छ ।
