नेपाल लयर्स एकेडेमी गठन गर्ने विषय मुख्य होः कानूनमन्त्री
काठमाडौं । कानून, न्याय तथा संसदीय मामिलामन्त्री अजयकुमार चौरसियाले नेपाल कानून व्यवसायी परिषद् ऐन, २०५० लाई संशोधन गर्न बनेको विधेयकमा नेपाल लयर्स एकेडेमी गठन गर्ने विषय मुख्य रहेको बताएका छन् ।
राष्ट्रिय सभाको बिहीवारको बैठकमा सांसदहरुले छलफलका क्रममा उठाउनुभएका प्रश्नको जवाफ दिँदै उनले यस्तो बताएका हुन् । उनले नेपाल कानून व्यवसायी परिषद् ऐन, २०५० लाई संशोधन गर्न बनेको विधेयक सम्बन्धमा गहन छलफल भएको र अझै परिष्कृत बनाउनुपर्ने बताए । उनले कानून व्यवसायीहरुलाई दक्ष बनाउने कुरा, तालिम दिने र ग्रेजुएटसम्मको पाठ्यक्रम बनाएर शिक्षा दिने कुराहरुको व्यवस्था विधेयकमा रहेको उल्लेख गरे ।
उनले भने, ‘नेपाल कानून व्यवसायी परिषद् ऐन, २०५० लाई संशोधन गर्न बनेको विधेयक सम्बन्धमा गहन छलफल भएको छ । कानून व्यवसायीहरुले आग्रह गरेको नेपाल लयर्स एकेडेमी गठन गर्ने विषय यसमा मुख्य छ । यसले कानून व्यवसायीहरुलाई दक्ष बनाउने कुरा, तालिम दिने र ग्रेजुएटसम्मको पाठ्यक्रम बनाएर शिक्षा दिनेकुराहरु व्यवस्था गरिएको छ र यस विधेयकमा कानून व्यवसायीहरुलाई अनुशासनको कारबाही गर्नुपरे, सचेत गराउनुपरे र कारबाही गर्नुपरे उनीहरुको एशोसिएशनले कारबाही गर्नेकुराको व्यवस्था गरेको छ । साथै कानून व्यवसायी परिषद्को आग्रहमै यो आएको हो । यसलाई अझ परिष्कृत कसरी बनाउने त्यसमा ध्यान दिनुपर्छ ।’
मन्त्री चौरसियाले विधेयकमा कानून व्यवसायीहरुलाई अनुशासनको कारबाही गर्नुपरे र सचेत गराउनुपरे एशोसिएशनले कारबाही गर्नेकुराको व्यवस्था गरेको उल्लेख गरे ।
