स्याङ्जामा चोरी गरी फरार व्यक्ति पक्राउ
काठमाडाैँ । स्याङ्जाको हरिनास गाउँपालिकामा चोरी गरी फरार व्यक्ति पक्राउ परेका छन् ।
पक्राउ पर्नेमा भारतकाे बिहार राज्य जिल्ला बेतियाग्राम पंन्चायत ईनर्वा ५ बस्ने ३० वर्षीय मनोज कुमार महतो रहेको जिल्ला प्रहरी कार्यालय स्याङ्जाले जनाएकाे छ ।
महतोलाई शनिबार पर्साको विरगञ्ज महानगरपालिका वडा नम्बर १६ स्थित विरगञ्च बसपार्क हातभित्रबाट समानहरुसहित पक्राउ गरिएको जिल्ला प्रहरी कार्यालय स्याङ्जाका प्रहरी नायव उपरीक्षक इन्द्र बहादुर राना जानकारी दिए ।
हरिनास गाउँपालिका वडा नम्बर २ पुछौदी बस्ने ५० वर्षीय बाकृष्ण सिग्देलले संचालन गरेको होमिक्स समिल फर्निचर उद्योगमा रहेको समानहरू चोरी गरी महतो फरार भएका थिए ।
उनको साथबाट प्रहरीले जेनरेटर, कम्प्रेसर मेसिन, खराद मेसिन, रन्दा कटर साईजर मेसिन डाईनामो, नट बोल्ट खोल्ने रिन्चिहरू बरामद गरेको बताएको छ ।
महतोलाई चोरी तथा डाँका सम्बन्धी कसूर मुद्दा गरी सोमबार जिल्ला अदालत स्याङ्जाबाट म्याद थप अनुमति लिइ थप अनुसन्धान कार्य गरिरहेको जिल्ला प्रहरी कार्यालय स्याङ्जाले जनाएकाे छ ।
