उदयपुरको कटारीमा आमाछोराको हत्या

काठमाडौं । उदयपुरको कटारी नगरपालिका–१० सोरुङ छविसेमा आमाछोराको हत्या भएको छ । वडा कार्यालयनजिकै किराना पसल गर्दै आएकी अन्दाजी ४० वर्षीया निर्मला थापा र उनका अन्दाजी ६ वर्षीय छोरा आरुस थापाको आज बिहान पसलमै शव भेटिएको हो ।

बिहान पसलमा आउने ग्राहकहरूले आमाछोराको शव देखेको वडाध्यक्ष क्षेत्रबहादुर खड्काले बताए ।

‘उनले भने आमाको शव भुइँमा घोप्टो परेको र छोराको खाटमा रगतमा डुबेको अवस्थामा र छोराको शवमा हतियार प्रहार गरेको चोटहरू लागेको अवस्थामा भेटिएको हो ।

इलाका प्रहरी कार्यालय कटारीका प्रहरी निरीक्षक उमेश महतोले बिहानै घटनाबारे जानकारी प्राप्त हुनासाथ प्रहरी घटनास्थलतर्फ पठाइसकेको बताए ।

घटनास्थल कटारी बजारबाट ३२ किलोमिटर उत्तरपहाडी भेगमा पर्दछ । घटनाको विषयमा थप अनुसन्धान भइरहेको प्रहरीले जनाएको छ ।