रोल्पा गङ्गादेव गाउँपालिकाको नाम सुकीदह नै कायम, केन्द्र समेत पुरानै
काठमाडौँ । रोल्पाको गङ्गादेव गाउँपालिकाको नाम परिवर्तन भएको छ ।
संघीय मन्त्रीपरिषद्को भदौ २० गतेको बैठकले गङ्गादेव गाउँपालिकाको नाम परिवर्तन गरेको हो ।
उक्त पालिकाको नाम स्थापनाकालमा सुकीदह थियो । स्थानीय तहको पहिलो निर्वाचनमा नेकपा माओवादी केन्द्रबाट निर्वाचित अध्यक्ष वीरबहादुर खत्रीले माओवादी जनयुद्धमा साहदत प्राप्त गरेका व्यक्तिको नामबाट नामाकरण गर्ने भन्दै गङ्गा र देवको नाम जोडर गङ्गादेव गाउँपालिका नामाकरण गर्ने निर्णय गरेका थिए ।
निर्णयलाई संघीय सरकारले कार्यान्वयन गरेको थियो ।
गङ्गादेवमा गत स्थानीय निर्वाचनमा माओवादी केन्द्रले हार्याे । पालिकामा कांग्रेसले जितेपछि सुकीदह नाम नै कायम गर्ने निर्णय गरेको थियो ।
निर्णयलाई पालिका हुँदै प्रदेश सरकारले संघमा सिफारिस गरेका थिए । सिफारिस विरुद्ध गङ्गादेव नामको पक्षधर अदालतसम्म पुगेका थिए । अदालतले रिट खारेज गरिदिएको थियो ।
अहिले संघमा कांग्रेस र एमालेको संयुक्त सरकार बनेपछि पालिका र प्रदेश सरकारको सिफारिसलाई संघीय सरकारले निर्णय गरेर गङ्गादेव खारेज गर्दै सविककै सुकीदह नाम कायम गरिदिएको हो ।
तत्कालीन अध्यक्ष खत्रीको पालामा जिनाबाङमा भएको केन्द्रलाई वडा नं. ५ सानाडाँडामा सारिएको थियो । अहिले फेरी संघीय सरकारले नामसँगै पालिकाको केन्द्रलाई समेत जिनाबाङमै कायम गरिदिएको छ ।
रोल्पामा सुरुमा राखिएका तीन पालिकाको नाम परिवर्तन गरिएको थियो ।
सुवर्णावतीको सुनिलस्मृति, दुईखोलीको नाम फेरेर परिवर्तन गाउँपालिका बनाइएको थियो ।
तीनवटै पालिकाको नाम माओवादी जनयुद्धमा साहदत प्राप्त गरेका व्यक्तिको नाम राखेर फेरिएको थियो । यसमध्ये एउटाको नाम उल्टिएको छ ।
