तीनवर्षे रणनीति बनाउन चेम्बर लुम्बिनीको सिङ्गो टोली पाल्पामा
तानसेन । नेपाल चेम्बर अफ कमर्स लुम्बिनी प्रदेशको रणनीतिक योजना कार्यशाला पाल्पाको तानसेनमा बिहीबार सुरु भएको छ ।
चेम्बर लुम्बिनी प्रदेशको भर्खरै अधिवेशन सम्पन्न भएपछि आगामी ३ वर्षका लागि कार्ययोजना तयार पार्न रणनीतिक कार्यशाला आयोजना गरिएको चेम्बरले बताएको छ ।
कार्यशालाको उद्घाटन गर्दै तानसेन नगरपालिकाका नगर प्रमुख सन्तोषलाल श्रेष्ठले तानसेनसहित सिङ्गो पाल्पाको पर्यटन र व्यवसायिक प्रवद्र्धनका लागि सहयोग गर्न आह्वान गरे । स्वास्थ्य, शिक्षा र व्यवसायका लागि तानसेन ऐतिहासिक हव हुँदाहुँदै पनि पछाडि परेकोमा चिन्ता व्यक्त गरे।
पर्यटनका दृष्टिले तानसेनमा अपार सम्भावना रहेकाले पर्यटनलगायतका क्षेत्रमा लगानी गर्न आह्वान गरे । बुटवल–पोखरा ६ लेन सडक निर्माण सम्पन्न हुँदासम्म तानसेन र आसपासका पर्यटकीय क्षेत्रमा पर्यटन पुर्वाधारहरु निर्माण गरेर लाखौं पर्यटक भित्र्याउन सकिने सम्भावना औंल्याए ।
चेम्बर लुम्बिनीका अध्यक्ष टंक पोख्रेलले आगामी ३ वर्षभित्र लुम्बिनी चेम्बरले अन्तर्राष्ट्रिय, राष्ट्रिय, प्रादेशिक, जिल्ला र पालिका स्तरिय कार्यक्रम आयोजना गर्नेगरी रणनीतिक योजना बनाउने बताए । अघिल्लो कार्यकालमा चेम्बरलाई बिस्तार गर्ने अधिकांश काम भएकाले अबको ३ वर्ष उद्योगी, व्यवसायीको अभिभावक संस्थाका रुपमा विकास गर्ने बताए । चेम्बरले तीनै तहका सरकारहरुसँग सहकार्य गरेर अगाडि बढ्न चाहेको बताउँदै त्यसका लागि साथ र सहयोग आवश्यक रहेको बताए ।
कार्यक्रममा बोल्दै चेम्बर लुम्बिनीका वरिष्ठ उपाध्यक्ष श्रीधर महराले व्यवसायिक हकहितका लागि चेम्बरले कुनै कसर बाँकी नराख्ने बताए । परम्परागत भन्दा भिन्न गतिविधि गरेर यसपाली चेम्बरले आफ्ना गतिविधि गर्ने बताए ।
कार्यक्रमलाई सहजीकरण गर्दै प्रशिक्षक मुकुन्द ज्ञवालीले चेम्बर लुम्बिनीले आगामी ३ बर्ष गर्न सक्ने गतिविधिलाई कसरी पृथक बनाउन सकिन्छ भन्ने विषयमा सहजीकरण गरेका छन् ।
चेम्बर लुम्बिनीको कार्यसमिति र विभिन्न जिल्ला र नगरकार्यसमितिका अध्यक्षहरु उपस्थित भएको कार्यशालाबाट चेम्बर लुम्बिनी र मातहतका समितिहरुले गर्ने कार्यक्रमको रणनीति बनाउने छ । सो अवसरमा महासचिव शिव ज्ञवाली, उपाध्याय जेपि कडेलले मन्तव्य व्यक्त गरेका थिए ।
