४० बर्ष मुनिका युवाहरूकाे राष्ट्रिय शिखर सम्मेलन गर्दै एमाले

दाङ। नेकपा एमालेका महासचिव शंकर पाेख्रेलले युवा पुस्तालाई पार्टी काममा जाेड्ने याेजना अनुसार ४० बर्ष मुनिका युवाहरूकाे राष्ट्रिय शिखर सम्मेलन आयाेजना गर्न थालिएको जानकारी दिएका छन ।

नेपाल कम्युनिस्ट पार्टी एमाले लुम्बिनी प्रदेश भित्रका केन्द्रीय सदस्यहरूकाे छलफल तथा अन्तरक्रिया कार्यक्रमलाई आइतबार तुलसीपुरमा सम्बाेधन गर्दै महासचिव पाेख्रेलले नयाँ पुस्ताकाे बिचमा पार्टीलाई पुर्‍याउने गरी पार्टीले जाेजना बनाएकाे बताएका हुन ।

४० बर्ष मुनिका युवाहरूलाईलक्षित गरेर शिखर सम्मेलन आयाेजना गर्न थालिएको बताएका छन । पार्टीमा युवा पुस्तालाई आकर्षित गर्दै संगठन बिस्तार र सदस्यता वितरणलाइ व्यापक बनाउदै पार्टी कामलाई व्यवस्थित गरेर अघि बढ्न निर्देशन दिए ।

युवालाई आकर्षित गर्ने र पुराना कार्यकर्ताहरूलाई जाेड्नेगरी प्रभावकारी याेजना निर्माण गरेर काममा खटिन महासचिव पाेख्रेलले आग्रह गरे । उनले भने, “पार्टीले बनाएकाे याेजना अनुसार पार्टीलाई व्यवस्थित गरेर अघि बढ्नुपर्छ ।”

जनसराेकारकाे मुद्दामा पार्टीलाई अग्रपंक्तिमा उभ्याउन निर्देशन दिए । यस्तै उनले प्रशिक्षणलाई पार्टी नेतृत्वकाे आधारकाे रुपमा विकास गर्नुपर्ने बताए । “पार्टी कार्यालयलाई पनि व्यवस्थित बनाउन निर्देशन दिए ।पार्टी कार्यालय जनसम्पर्ककाे प्रमुख थलाे बन्नुपर्छ । पार्टी कार्यालय अभिलेख कार्यालय पनि हाे । सबै चिजकाे रेकर्ड व्यवस्थित हुनुपर्छ,"उनले भने,”पार्टीकाे प्रचारकाे कामलाई व्यवस्थित गरिनुपर्छ । साेसल मिडिया नेटवर्क बनाउनुपर्ने छ ।”

नयाँ कामका क्षेत्रकाे पहिचान गरेर परिचालन हुनुपर्ने बताए । लुम्बिनी प्रदेशका पार्टी अध्यक्ष राधाकृष्ण कँडेलकाे अध्यक्षता र महासचिव शंकर पाेख्रेलकाे प्रमुख आतिथ्यता बैठक बसेकाे हाे । पार्टीको कामलाई सांगठनिक, राजनीतिक र समृद्धिकाे रुपमा अभियानलाइ व्यापक बनाउने बिषयमा छलफल गरिएको थियाे ।