प्रतिबन्धित लागुऔषध सहित एक व्यक्ति दक्षिणकालीबाट पक्राउ

काठमाडौँ । काठमाडाैँकाे दक्षिणकाली नगरपालिका वडा नम्बर ५ स्थित फर्पिङ चेकपोष्टमा चेकजाँचको क्रममा प्रतिबन्धित लागुऔषध सहित एक व्यक्ति पक्राउ परेका छन्।

प्रहरीका अनुसार, ना १ ज १९१० नम्बरको टाटा सुमोमा रौतहटबाट काठमाडौँतर्फ जाँदै गरेका नासिम शेखलाई शंका लागेपछि चेकजाँच गर्दा उनको साथमा कालो रंगको क्याट लेखिएको झोलामा लुकाई ल्याइएको १७८१ एम्पुल लागुऔषध फेला परेको थियो।

पक्राउ परेका नासिम शेख, रौतहटको गुजरा नगरपालिका वडा नम्बर ३ निवासी हुन्। प्रहरीले शेखको साथबाट नुफिन ५९३ एम्पुल, फेनारगन ५०० एम्पुल, र डाईजेपाम ६८८ एम्पुल बरामद गरेको छ।

प्रहरी वृत्त कीर्तिपुरले थप अनुसन्धान सुरू गरेको जनाएको छ।