साफ वुमन्स च्याम्पियनसिपः फाइनल खेलको प्रत्यक्ष प्रसारण टुँडिखेल, चावहिल, र हाँडीगाउँमा

काठमाडौँ । काठमाडौँ महानगरपालिकाले आज हुने साफ वुमन्स च्याम्पियनसिप २०२४ को फाइनल खेलको प्रत्यक्ष प्रसारणको व्यवस्था गर्ने जनाएको छ। यस खेलमा नेपाली महिला फुटबल टोलीले बंगलादेशको महिला टोलीसँग प्रतिस्पर्धा गर्दैछ, र यस खेलप्रति खेलप्रेमी दर्शकको अत्यधिक उत्साह रहेको छ।

प्रत्यक्ष खेल अवलोकन गर्न नसक्ने दर्शकलाई खेल मैदान जत्तिकै रोमाञ्चक वातावरणमा खेल हेर्ने अवसर प्रदान गर्न महानगरले टुँडिखेल, चावहिल फुटबल मैदान र हाँडीगाउँस्थित सानो गौचरनमा एलइडी स्क्रिन राखी प्रत्यक्ष प्रसारणको व्यवस्था गरेको छ। यस अवसरमा नेपाली टिमलाई प्रोत्साहन र समर्थन जनाउन दर्शकहरूलाई सो स्थानमा उपस्थित हुन आग्रह गरिएको छ।

महानगरले खेलको प्रवर्धन, खेलाडी, प्रशिक्षक, र व्यवस्थापन टोलीको हौसला बढाउन प्रत्यक्ष प्रसारणलाई सहयोग पुर्याउने जनाएको छ।