बस दुर्घटना हुँदा अर्घाखाँचीमा दुई जनाकाे मृत्यु

दाङ । बस दुर्घटना हुँदा अर्घाखाँचीमा दुई जनाकाे मृत्यु भएकाे छ । जिल्लाकाे भूमिकास्थान नगरपालिकास्थित जयठाटीमा भएको बस दुर्घटनामा परी दुई जनाकाे मृत्यु भएको जिल्ला प्रहरी कार्यालय अर्घाखाँचीले जनाएकाे छ ।

नगरपालिकाकाे वडानम्वर ५ र ६ को सिमाना पर्ने जयठाटीमा सोमबार साँझ ५ बजेतिर देउसीभैलो नाचिरहेको स्थानमा ना ३ ख २४७१ नं को बसको ‘ब्रेक फेल’ हुँदा दुर्घटना भएको कार्यालयले जनाएकाे छ ।

बसले भैलो खेलिरहेकालाई ठक्कर दिएकाेमा एक महिलाको घटनास्थलमा र अर्की एक महिलाकाे अर्घाखाँची अस्पतालमा उपचारका क्रममा मृत्यु भएको जिल्ला प्रहरी कार्यालय अर्घाखाँचीका प्रहरी नायब उपरीक्षक चक्रबहादुर मल्लले जानकारी दिए ।

दुर्घटनामा दुई दर्जन भन्दा बढी घाइते भएका छन्। घाइतेलाई स्थानीय स्वास्थ चाैकी र जिल्ला अस्पताल सन्धिखर्कमा उपचारका पठाइएको छ।