उपनिर्वाचनः आज उम्मेदवारको अन्तिम नामावली प्रकाशन हुँदै

काठमाडौँ ।आउँदाे मङ्सिर १६ गते हुन गइरहेको स्थानीय तह उपनिर्वाचनअन्तर्गत आज (बुधबार) उम्मेदवारको अन्तिम नामावली प्रकाशन हुँदैछ ।

आज बिहान ९ देखि अपराह्न १ बजेसम्म उम्मेदवारले नाम फिर्ता लिन सक्ने र दिउँसो १ देखि ३ बजेसम्म अन्तिम नामावली प्रकाशन हुने निर्वाचन आयोगले बताएको छ ।

यसैगरी आज दिउँसो ३ देखि ५ बजेसम्म उम्मेदवारलाई निर्वाचन चिह्न प्रदान गरिने छ ।मंगलबार उम्मेदवारको नामावली प्रकाशन भएको थियो । कुल ४४ पदमा हुन लागेको निर्वाचनमा ४१० जनाको उम्मेदवारी परेको छ । उपनिर्वाचनका लागि आइतबार मनोनयनपत्र दर्ता गरिएको थियो ।