स्याङ्जामा एक पुरुष मृत अवस्थामा फेला

काठमाडौँ । स्याङ्जाको पुतलीबजार नगरपालिका वडा नम्बर ३ काफलडाँडा घर्तिगाउँका ६३ वर्षीय गोपाल घर्ति मृत अवस्थामा फेला परेका छन्।

जिल्ला प्रहरी कार्यालय, स्याङ्जाका अनुसार, हिजो (शनिबार) साँझ करिब ४ बजे मादक पदार्थ सेवन गरी बाडखोलातर्फ जान्छु भन्दै घरबाट हिँडेका घर्ति राति घर नफर्किएपछि परिवारले खोजतलास थालेका थिए।

खोजतलासका क्रममा आज बिहान करिब ७:४० बजे घरबाट करिब १०० मिटर पूर्व रहेको गोरेटो बाटोमा उनी मृत अवस्थामा भेटिएको प्रहरीले जनाएको छ।

हाल घटनाको थप अनुसन्धान भइरहेको जिल्ला प्रहरी कार्यालय, स्याङ्जाका सूचना अधिकारी उमेशलाल श्रेष्ठले जानकारी दिए ।