एनपिएल क्रिकेटको फाइनल खेलको दौरान अभद्र व्यवहारमा संलग्न दुई जना प्रहरी नियन्त्रणमा

काठमाडौँ । नेपाल प्रिमियर लिग (एनपिएल) को फाइनल खेलको समाप्ति पश्चात कीर्तिपुरस्थित त्रि.वि क्रिकेट ग्राउण्डमा केही व्यक्तिहरूले अभद्र व्यवहार र साम्प्रदायिक सद्भाव बिगार्ने प्रयास गरेकोमा दुई जनालाई प्रहरीले नियन्त्रणमा लिएको छ।

गत शनिवार जनकपुर बोल्टस र सुदुरपश्‍चिम रोयल बिचको फाइनल खेल सम्पन्न भएपछि केही व्यक्तिहरूले अपमानजनक शब्दहरू प्रयोग गर्दै विभिन्न व्यक्तिहरूसँग अभद्र व्यवहार गरेका थिए। यस घटनामा संलग्न भएका व्यक्तिहरूसँग जोडिएको अनुसन्धानले प्रहरीलाई उक्त दुई व्यक्तिलाई नियन्त्रणमा लिन सफल बनाएको हो।

नियन्त्रणमा लिइएका व्यक्तिहरूमा २१ वर्षीय अशोक साउद रहेका छन्, जो डोटी आदर्श गाउँपालिका वडा नम्बर ०२ का निवासी हुन् र हाल काठमाडाैँको कीर्तिपुर नगरपालिका वडा नम्बर ०८ पाँगा बस्छन्। यस्तै, १९ वर्षीय गणेश साउद पनि नियन्त्रणमा लिइएका छन्, जो डोटी दिपायल सिलगढी नगरपालिका वडा नम्बर १ का निवासी हुन् र हाल काठमाडाैँको कीर्तिपुर नगरपालिका वडा नम्बर ०७ भाजङगल बस्छन्। प्रहरीले घटनामा संलग्न अन्य व्यक्तिहरूकाे खोजी जारी राखेको जनाएको छ।