अखिल पाठशालाका लागि एमाले महासचिव पोख्रेल दाङ आउँदै
दाङ । नेकपा (एमाले) का महासचिव शंकर पोखरेल दाङ आउने भएका छन् । अनेरास्ववियुले आयोजना गर्न लागेको अखिल पाठशाला कार्यक्रमलाई सम्बोधन गर्न महासचिव पोखरेल दाङ आउन लागेका हुन् ।
विद्यार्थीहरुमा अध्ययन संस्कृतिको विकास गर्नका लागि अनेरास्ववियु दाङले यही पुस १५ गते घोराहीमा अखिल पाठशाला–२०८१ को आयोजना गर्न लागेको भन्दै जिल्ला सचिव सविन पोखरेलले कार्यक्रमलाई सम्बोधन गर्न पार्टी महासचिव शंकर पोखरेल र संगठनका महासचिव नरेश रोकाय आउन लागेको जानकारी दिए ।
उनका अनुसार अखिल पाठशालामा पार्टी महासचिव पोखरेलले माक्र्सवादी दर्शनको आधारभूत सिद्धान्त र जनताको बहुदलिय जनवाद, अनेरास्ववियुका महासचिव नरेश रोकायले अनेरास्ववियुको कार्यदिशा, कार्यभार र इतिहास विषयमा प्रशिक्षण दिनेछन् ।
त्यस्तै एमाले पोलिटव्यूरो सदस्य नरुलाल चौधरीले विद्यालय शिक्षाको गुणस्तर वृद्धिमा स्थानीय सरकारको भूमिका, केन्द्रीय सदस्य जीवन गौतमले शिक्षा क्षेत्रमा रहेका समस्या र यसको समाधानका लागि अनुरास्ववियुको भूमिका, पार्टी अध्यक्ष शिवकुमार आचार्यले कन्फिलिक्ट अफ इन्ट्रेस्ट (हित बाझिने सिद्धान्त) र युवानेता विवेक श्रेष्ठले लेलिनवादी संगठनात्मक सिद्धान्त: संगठन निर्माण र परिचालनका विषयमा प्रशिक्षण दिने कार्यक्रम रहेको सचिव पोखरेलले जानकारी दिए ।
