लुम्बिनी प्रदेश सभाको दाेस्राे बैठक आज बस्दै : यस्ता छन् बैठकका कार्यसूची
दाङ। लुम्बिनी प्रदेश सभाको दाेस्राे बैठक आज दिउँसो १ः०० बजे बस्ने भएको छ। प्रदेश सभा सचिव दुर्लभकुमार पुनका अनुसार बैठकका लागि विभिन्न महत्वपूर्ण कार्यसूचीहरू निर्धारण गरिएका छन्।
बैठकमा सदस्यहरूले समसामयिक विषयमा आफ्ना विचार राख्ने छन् । यस क्रममा प्रदेशसभाका सदस्यहरूले क्षेत्रीय र राष्ट्रिय सरोकारका विषयमा आफ्नो धारणा प्रस्तुत गर्ने अपेक्षा गरिएको छ।
त्यसपछि, आर्थिक मामिला तथा योजना मन्त्री धनेन्द्र कार्कीले “प्रदेश आर्थिक कार्यविधि तथा वित्तीय उत्तरदायित्व सम्बन्धमा व्यवस्था गर्न बनेको विधेयक” सभा समक्ष पेश गर्ने कार्यक्रम रहेको छ। यो विधेयक प्रदेश सरकारको आर्थिक कार्यसम्पादन र वित्तीय अनुशासन सुदृढ बनाउन महत्त्वपूर्ण मानिन्छ।
त्यसैगरी, प्रदेश प्रमुखबाट सन्देशसहित फिर्ता गरिएका विधेयकहरूमा छलफल गर्न मुख्यमन्त्री चेतनारायण आचार्यले प्रस्ताव पेश गर्नेछन्। यी विधेयकहरूको पुनरावलोकन तथा आवश्यक सुधारका लागि सभा सदस्यहरूसँग छलफल गरिनेछ।
यस प्रकारका महत्त्वपूर्ण विधेयक र प्रस्तावहरूका कारण आजको बैठकले लुम्बिनी प्रदेशको प्रशासनिक तथा आर्थिक क्षेत्रमा दूरगामी प्रभाव पार्ने अपेक्षा गरिएको छ।
