स्याङ्जाको वालिङमा गएराति चोरी, ४ तोला सुन र २० हजार नगद गायब

स्याङ्जा । स्याङ्जाको वालिङ नगरपालिका वडा नम्बर १३ बायटारिमा गएराति एक घरमा चोरी भएको छ । करिब २:३० बजेको समयमा स्थानीय व्यवसायी भिम पराजुलीको घरमा चोरी हुँदा ४ तोला सुन र २० हजार नगद हराएको हो ।

जिल्ला प्रहरी कार्यालय स्याङ्जाका सूचना अधिकारी उमेशलाल श्रेष्ठले घटनाको पुष्टि गर्दै चोरीबारे अनुसन्धान भइरहेको जानकारी दिएका छन्। उनका अनुसार चोरी भएको घर पराजुलीको किराना पसलसँगै रहेको थियो।

प्रारम्भिक अनुसन्धानबाट ताला फुटाएर चोरहरूले नगद र सुन चोरेको पत्ता लागेको छ। पछिल्लो समय स्याङ्जा जिल्लामा यस्ता चोरीका घटनाहरू बढ्दै गइरहेको भन्दै स्थानीयहरूले अपराध न्यूनीकरणमा प्रहरीको सक्रियता बढाउनुपर्ने बताएका छन्।