प्रतिबन्धित लागुऔषध सहित एक युवक पक्राउ

काठमाडौँ । प्रतिबन्धित लागुऔषधसहित एक युवकलाई काठमाडौँ प्रहरीले पक्राउ गरेको छ। दक्षिणकाली नगरपालिका वडा नम्बर ५ फर्पिङको बसपार्कमा चेकजाँचका क्रममा प्रहरीको टोलीले इर्फान सेखलाई नियन्त्रणमा लिएको हो।

ईलाका प्रहरी कार्यालय फर्पिङबाट खटिएको टोलीले रौतहट गौरबाट काठमाडौँतर्फ आउँदै गरेको ना १ ज ८७५७ नम्बरको टाटा सुमोलाई चेकजाँच गर्दा १८ वर्षीय इर्फानको साथबाट ठूलो परिमाणमा लागुऔषध बरामद गरेको छ।

प्रहरीका अनुसार इर्फानले बोकेको कालो झोलामा लुकाएर राखिएको ६,००० ट्याब्लेट ट्रामाडोल हाइड्रोक्लोराइड क्याप्सुल बरामद गरिएको छ। पक्राउ परेका युवक रौतहट जिल्लाको परवानिपुर नगरपालिका वडा नम्बर २ जिङगडुवा निवासी हुन्।

बरामद सामग्री र युवकलाई प्रहरी वृत्त कीर्तिपुरमा राखी थप अनुसन्धान भइरहेको बताइएको छ।