झापामा लागू औषध र गैडाको खाग जस्तो देखिने वस्तु सहित एक व्यक्ति पक्राउ
काठमाडाैँ । झापाकाे मेचीनगर नगरपालिका वडा नम्बर ६ स्थित काँकरभिट्टामा प्रहरीले लागू औषध र गैडाको खाग जस्तो देखिने वस्तु सहित एक व्यक्तिलाई पक्राउ गरेको छ।
हिजाे ३:३० बजे हिमालय गेस्ट हाउसको कोठा नम्बर १०२ मा भारतको पश्चिम बङ्गाल, उत्तर मेन्दाबारी निवासी नारायण रामधाम बसिरहेको सूचनाको आधारमा प्रहरीले उक्त कोठामा छापा मारेको हो।
प्रहरी टोलीले तलासीको क्रममा इन्टेक्स लेखिएको काटुनभित्र गोलाई १८.६ इन्च, उचाई ८.६ इन्च, तौल १ केजी ७०० ग्रामको गैँडाको खाग जस्तो देखिने वस्तु फेला पारेको छ। साथै, प्रतिबन्धित लागू औषध खैरो हिरोइन ३ ग्राम ७६० मिलिग्राम (प्लाष्टिक बाहेक २ ग्राम ८०० मिलिग्राम), पाइइभोन स्पास प्लस लेखिएको १८ पत्ता ट्याबलेट, एसएफ-४०० लेखिएको डिजिटल तराजु, र भिभाे तथा लावा ब्रान्डका दुई वटा मोबाइल पनि बरामद भएका छन्।
पक्राउ परेका व्यक्तिलाई इलाका प्रहरी कार्यालय, काँकरभिट्टामा राखी थप अनुसन्धान भइरहेको जिल्ला प्रहरी कार्यालय झापाले जनाएको छ।
