निर्णायक राष्ट्रिय शक्ति निर्माणका लागि बामपन्थी ध्रुवीकरण–महासचिव पोखरेल
दाङ । नेकपा (एमाले) का महासचिव शंकर पोखरेलले निर्णायक राष्ट्रिय शक्ति निर्माणका लागि बामपन्थी ध्रुवीकरण आवश्यक रहेको बताएका छन् ।
नेपाल प्रगतिशील प्राध्यापक संगठन महेन्द्र बहुमुखी क्याम्पस र नेपाल बुद्धिजीवी परिषद् दाङले आयोजना गरेको अन्तर्संम्वाद कार्यक्रमलाई सम्बोधन गर्दै महासचिव पोखरेलले भने, “मुलुकको समृद्धिका लागि बलियो निर्णायक राष्ट्रिय शक्ति निर्माण गर्नु आवश्यक छ । यसका लागि बामपन्थी ध्रुवीकरण गर्नुपर्दछ । एमालेले बामपन्थी ध्रुवीकरणको मुद्दालाई प्राथमिकतामा रोखको छ ।”
इतिहासलाई शिक्षाका रुपमा लिँदै भविष्यको यात्रा तय गर्नुपर्ने भन्दै महासचिव पोखरेलले नेतृत्वका बिचमा भएको ध्रुवीकरण असफल भएकाले अब कार्यकर्ताको माध्यमबाट बामपन्थी ध्रुवीकरण गर्ने एमालेको तयारी रहेको बताए ।
“कम्युनिष्ट जनमतको कदर गरेर २०७४ मा नेकपा (एमाले) र नेकपा (माओवादी केन्द्रका बीचमा गरिएको एकता असफल भएकाले अब नेतृत्वको माध्यमबाट नभई कार्यकर्ताको माध्यमबाट बामपन्थी ध्रुवीकरण गर्नुपर्ने मान्यता हामीले अगाडि सारेका छौं”, महासचिव पोखरेलले भने ।
फरक प्रसंगमा बोल्दै महासचिव पोखरेलले बिआरआई सम्झौताबाट नौलो मान्यता स्थापित गरिएको दाबी गरे ।
“बिआरआई सम्झौताको ड्राफ्ट नेपाली काङ्ग्रेस र एमालेको सहमतिमा गरिएको हो । नेपालको इतिहासमै पहिलोपल्ट नेपाल आफैले तयार पारेको सम्झौतामा हस्ताक्षर भएको छ”, महासचिव पोखरेलले भने, “प्रमुख पार्टी मिल्दा हरेक कुरा सम्भव हुँदो रहेछ भन्ने प्रमाणित भएको छ । मुुलुकको समृद्धि र स्थायित्वका लागि गठन भएको सरकार निश्चित् उद्देश्य पुरा गर्नतर्फ अग्रसर छ ।”
संविधान संशोधन सम्बन्धि प्रधानमन्त्री केपी शर्मा ओलीको सार्वजनिक अभिव्यक्तिलाई लिएर आएका टिप्पणीप्रति लक्षित हुँदै महासचिव पोखरेलले भने, “संविधान संशोधनका लागि प्रतिनिधि सभा र राष्ट्रिय सभामा दुई तिहाइ बहुमत आवश्यक पर्ने र हाल उक्त जनमत दुवै सदनमा प्रयाप्त नहुँदासम्म संविधान संशोधनको मुद्दाले सार्थकता नपाउने सत्ता साझेदार दुवै दलका बीचमा छलफल भइरहेको छ । वर्तमान गठबन्धन यथावत रहेमा २०८७ सम्म राष्ट्रिय सभामा दुई तिहाइ बहुमत पुग्छ अनि संविधान संशोधनको विषयलाई टुंग्याउने सन्दर्भमा पार्टी अध्यक्षको अभिव्यक्ति आएको हो ।”
