स्कुटर दुर्घटनामा दाङमा एक जनाको मृत्यु
दाङ । दाङको तुलसीपुरमा स्कुटर दुर्घटना हुँदा एकजनाको मृत्यु भएको छ, भने एक जना गम्भीर घाइते भएका छन् । दुर्घटनामा परी तुलसीपुर उपमहानगरपालिका वडा नं. ६ निवासी २८ वर्षिय सुदिप भनेर चिनिने बाबुराम चौधरीको मृत्यु भएको इलाका प्रहरी कार्यालय तुलसीपुरले जनाएकाे छ ।
बिजौरीबाट भेलाईतर्फ गइरहेको रा ८ प ३१७९ नम्बरको स्कुटर तुलसीपुर–१६ स्थित राउतगाउँमा अनियन्त्रित भई दुर्घटना भएकाे प्रहरी प्रवक्ता विनोदराज खत्रीले जानकारी दिए । उनका अनुसार स्कुटर अनियन्त्रित भई दुर्घटना हुँदा स्कुटीमा सवार बाबुराम गम्भीर घाइते भएका थिए ।
गम्भिर घाइते उनलाई राप्ती प्रादेशिक अस्पताल तुलसीपुरमा सामान्य उपचारपछि नेपालगञ्जस्थित नर्सिङ होममा रिफर गरिएको थियो । तर, नेपालगञ्जबाट बाबुरामलाई बिहान ८ बजे घर ल्याइएको र पुनः राप्ती प्रादेशिक अस्पतालमा पुर्याइएपछि बिहान १०:१५ बजे चिकित्सकले मृत घोषित गरेका थिए ।
मृतक चौधरीको शव हाल राप्ती प्रादेशिक अस्पतालमा राखिएको छ । दुर्घटनामा स्कुटर चालक तुलसीपुर–६ निवासी २८ वर्षिय सुमन चौधरी गम्भीर घाइते भएका छन्। प्रहरीका अनुसार सुमनलाई पनि सामान्य उपचारपछि हिजो साढे ९ बजे नेपालगञ्जस्थित नर्सिङ होममा थप उपचारका लागि पठाइएको छ।
घटनास्थलबाट स्कुटरलाई नियन्त्रणमा लिइएको र घटनाको थप अनुसन्धान भइरहेको इलाका प्रहरी कार्यालय तुलसीपुरले जानकारी दिएको छ।
