सामाजिक सञ्जालमार्फत चरित्रहत्या गरेको अभियोगमा २ जना पक्राउ
काठमाडौँ । सामाजिक सञ्जालको दुरुपयोग गर्दै चरित्रहत्या गरेको अभियोगमा २ जनालाई प्रहरीले पक्राउ गरेको छ।
पक्राउ पर्नेहरूमा रामेछाप खाँडादेवी गाउँपालिका वडा नम्बर ८ धुले बेसी घर भई काठमाडौं महानगरपालिका १३ बस्ने १९ वर्षीय श्रीकृष्ण कार्की र भोजपुर षडानन्द नगरपालिका ५ घर भई काठमाडौं महानगरपालिका ६ बौद्ध नयाँ बस्ती बस्ने ३१ वर्षीय सरोज कटुवाल रहेका छन्।
प्रारम्भिक अनुसन्धान अनुसार, उनीहरूले प्रेम सम्बन्धको क्रममा खिचिएका तस्विर र भिडियोहरू, सम्बन्ध बिग्रिएपछि, पीडितका आफन्त र साथीहरूलाई सामाजिक सञ्जाल म्यासेन्जरमार्फत पठाएका थिए, जसबाट पीडितको चरित्र हत्या गरिएको थियो। साइबर ब्यूरोको टोलीले श्रीकृष्णलाई आइतबार र सरोजलाई सोमबार पक्राउ गरेको हो।
पक्राउ परेका दुबैजनाविरुद्ध विद्युतीय कारोबार ऐन, २०६३ अन्तर्गतको कसुरमा म्याद थप अनुमती लिई अनुसन्धान भइरहेको प्रहरीले जनाएकाे छ ।
