स्याङ्जाको पुतलीबजार नगरपालिकामा शंकास्पद वस्तु फेला, अनुसन्धान जारी

स्याङ्जा । पुतलीबजार नगरपालिका वडा नम्बर १४ लामागेमा शंकास्पद वस्तु फेला परेको छ।

जिल्ला प्रहरी कार्यालय स्याङ्जाका प्रहरी नायव उपरीक्षक हरि प्रसाद पौडेलमन अनुसार आज बिहान करिब १०:१५ बजे ७१ वर्षीय विष्णु प्रसाद पौडेलको खेतमा जेसीभीले खेत सम्याउने क्रममा सतहबाट तार जडित फलामको बोतलजस्तो देखिने वस्तु भेटिएको हो।

घटनास्थलमा तत्कालै जिल्ला प्रहरी कार्यालयबाट प्रहरी अधिकारीहरूको टोली खटिएको छ। साथै, आँधिखोलास्थित सिंह शार्दुल गुल्म ब्यारेकबाट नेपाली सेनाको टोली पनि परिचालित भएको छ। शंकास्पद वस्तु टुईचमोटरको गोलीजस्तो देखिने बताइएको छ।

यस घटनामा थप अनुसन्धानका लागि पोखरा पृतनाबाट बम डिस्पोजल टोलीलाई पनि बोलाइएको छ। अहिले घटनास्थल सुरक्षित बनाइएको छ भने अनुसन्धान कार्य जारी रहेको छ।