प्रतिनिधिसभाकाे अर्थसमितिमा लुम्बिनीको विकासमा चासो
लुम्बिनी । प्रतिनिधिसभाअन्तर्गत अर्थ समितिका सभापतिसहितको टोलीले आइतबार लुम्बिनीको ऐतिहासिक एवं धार्मिक महत्त्व बोकेको क्षेत्रमा भ्रमण गरेको छ।
सभापति सन्तोष चालिसेको नेतृत्वमा आएका प्रतिनिधिसभा सदस्यहरूले लुम्बिनीस्थित मायादेवी मन्दिरको दर्शन गर्दै लुम्बिनीको विकासका विभिन्न आयामबारे चासो व्यक्त गरेका छन्।
समितिका सदस्यहरूलाई लुम्बिनी विकास कोषका सदस्य सचिव सानुराजा शाक्यले स्वागत गरेका थिए। भ्रमणका क्रममा कोषका सदस्य सचिव शाक्यले लुम्बिनी गुरुयोजनाको बाँकी काम, बजेट अभाव, तथा पछिल्ला गतिविधिबारे विस्तृत जानकारी गराउँदै लुम्बिनीको पुरातात्विक, धार्मिक, र सांस्कृतिक महत्त्वका विषयमा प्रकाश पारे।
गुरुयोजना प्रगति र बजेट अभावमा ध्यानाकर्षण
अर्थ समितिका सदस्य सूर्य थापाले लुम्बिनीलाई विश्वभरका बौद्धमार्गी र शान्तिकर्मीहरूका लागि पवित्र तीर्थस्थल भएको भन्दै यसको विकासका लागि थप चासो र पहल आवश्यक रहेको बताए।
उनले लुम्बिनी गुरुयोजनाको हालसम्म ८८ प्रतिशत काम सम्पन्न भएको जानकारी दिँदै बाँकी काम पूरा गर्न बजेट अभावको समस्या रहेको उल्लेख गरे। थापाले बाँकी काम सम्पन्न गर्न आवश्यक बजेट व्यवस्थाका लागि आफूहरूले ध्यान दिने प्रतिबद्धता जनाए ।
विकासका लागि थप पहल आवश्यक
सदस्य सचिव शाक्यले पछिल्ला केही वर्षयता लुम्बिनी विकासका लागि बजेट कटौती हुँदै आएको तथ्य प्रस्तुत गर्दै सांसदहरूको ध्यानाकर्षण गराए । लुम्बिनीको महत्त्वलाई जोगाउन र गुरुयोजना सम्पन्न गर्न ठोस रणनीतिका साथ अगाडि बढ्नुपर्ने आवश्यकता उनले औंल्याए ।
भ्रमणका क्रममा सांसदहरूले मायादेवी मन्दिर, पवित्र पुष्करणी पोखरी, अशोकस्तम्भ, र विभिन्न विहार क्षेत्रहरूको अवलोकन गरेका थिए। लुम्बिनीको ऐतिहासिक, धार्मिक, र सांस्कृतिक सम्पदाले सांसदहरूलाई प्रभावित पारेको बताइएको छ।
यस भ्रमणले लुम्बिनीको दीर्घकालीन विकासका लागि बजेट व्यवस्थापन, गुरुयोजनाको सम्पूर्ण कार्यान्वयन, र राष्ट्रिय एवं अन्तर्राष्ट्रिय सहयोग जुटाउन सांसदहरूलाई प्रेरित गर्ने अपेक्षा गरिएको छ। लुम्बिनी, केवल एक धार्मिक स्थल मात्र नभई, नेपालका लागि सांस्कृतिक, पर्यटकीय र आर्थिक विकासको केन्द्र बन्न सक्छ भन्ने विश्वास सांसदहरूले व्यक्त गरेका छन्।
