पाथीभरा केबलकार निर्माणमा एमालेको चासो : विवाद समाधानका लागि छलफल अघि बढाउने

काठमाडाैँ । सत्तारुढ दल नेकपा (एमाले) ले ताप्लेजुङस्थित पाथीभरा केबलकार निर्माणका सन्दर्भमा उत्पन्न विवाद समाधान गर्न स्थानीय जनप्रतिनिधि, प्रशासन तथा सरोकारवाला समूहहरूसँग छलफल गरी निर्माण प्रक्रिया अघि बढाउनुपर्ने बताएको छ।

आइतबार पार्टीको केन्द्रीय कार्यालय च्यासलमा बसेको केन्द्रीय सचिवालय बैठकले विवाद समाधानका लागि समन्वयात्मक प्रयासलाई तीव्रता दिनुपर्ने निष्कर्ष निकालेको हो ।

बैठकपछि पार्टीका महासचिव शंकर पोखरेलले पाथीभरा केबलकार निर्माणबारे देखिएको असमझदारी समाधान गर्न स्थानीय तह, प्रशासन र सरोकारवाला निकायहरूसँग संवाद अघि बढाइने जानकारी दिए।

संवाद र सहकार्यको मार्ग

महासचिव पोखरेलका अनुसार पार्टीले केबलकार निर्माण प्रक्रियालाई सहज बनाउन आवश्यक पहल गर्नेछ । उनले भने, “ताप्लेजुङको प्रसिद्ध पाथीभरा केबलकार निर्माणमा उत्पन्न विवाद समाधानका लागि स्थानीय तह, प्रशासन र सरोकारवाला निकायहरूसँग सहमति जुटाउने दिशामा अघि बढ्नुपर्नेमा पार्टीको ध्यानाकर्षण भएको छ। सम्वन्धित पक्षबीच छलफल गरी विवाद अन्त्य गर्दै निर्माण कार्यलाई गति दिनुपर्छ ।”

उनले केबलकार निर्माणलाई सहज वातावरण प्रदान गर्नुपर्नेमा जोड दिँदै थपे, “सम्बन्धित पक्षहरूसँग निरन्तर संवाद गरी सहमतिको आधार तय गर्ने एमालेको नीति हो। हामी विवादको अन्त्य गरी सकारात्मक वातावरण सिर्जना गर्न चाहन्छौं ।”

समृद्धि र पर्यटन प्रवर्द्धनमा योगदान

पाथीभरा धार्मिक, सांस्कृतिक र पर्यटकीय हिसाबले महत्त्वपूर्ण गन्तव्य भएकाले केबलकार निर्माणले स्थानीय तथा राष्ट्रिय पर्यटन प्रवर्द्धनमा टेवा पुर्‍याउने अपेक्षा गरिएको छ। यही सन्दर्भमा एमालेले यस परियोजनालाई व्यवस्थित रूपमा अघि बढाउनेतर्फ ध्यान दिइरहेको महासचिव पोखरेलको भनाइ छ।

पार्टीको निर्णयअनुसार अब सम्बन्धित सबै पक्षहरूसँग समन्वय गर्दै केबलकार निर्माण प्रक्रिया अघि बढाउने पहल गरिनेछ। एमालेको यो सक्रियताले पाथीभरा क्षेत्रको पर्यटन विकासलाई नयाँ उचाइमा पुर्‍याउने अपेक्षा गरिएको छ।