रूस ३० दिने युद्धविरामको पक्षमा रहेको पुटिनको दाबी
काठमाडाैँ । रूसी राष्ट्रपति भ्लादिमिर पुटिनले संयुक्त राज्य अमेरिका र युक्रेनले प्रस्ताव गरेको ३० दिने युद्धविराम योजनाको समर्थन रहेको बताएका छन् ।
उनले शत्रुता रोक्ने प्रस्तावहरूसँग सहमति रहेको तर युद्धविराम दीर्घकालीन शान्ति स्थापना गर्न र द्वन्द्वका मूल कारणहरू हटाउने गरी हुनुपर्ने बताएका छन् ।
बेलारुसी राष्ट्रपति अलेक्ज्याण्डर लुकाशेन्कोसँग मस्कोमा भएको पत्रकार सम्मेलनमा पुटिनले युद्धविराम उल्लङ्घनको निगरानीमा कठिनाइ हुने बताए ।
उनले २ हजार किलोमिटर लामो सम्पर्क रेखामा द्वन्द्व जारी रहेकाले युद्धविराम कार्यान्वयन चुनौतीपूर्ण हुने उल्लेख गरे। पुटिनले युक्रेन युद्धविरामलाई आफ्ना सेनालाई पुनःसंयोजन गर्न र थप हतियार आपूर्ति लिन प्रयोग गर्नसक्ने आशंका व्यक्त गरे ।
उनले विशेष रूपमा कुर्स्क क्षेत्रको प्रसंग उल्लेख गर्दै अगस्ट २०२४ मा सीमापार आक्रमणपछि रूसी सेनाले युक्रेनी सेनालाई पराजित गरिरहेको दाबी गरे ।
रूस–युक्रेन युद्ध २०२२ देखि जारी छ । पछिल्लो समय युद्ध रोक्ने प्रयासस्वरूप विभिन्न राष्ट्रहरूले वार्ताको पहल गरिरहेका छन् । संयुक्त राज्य अमेरिका र युक्रेनले प्रस्ताव गरेको ३० दिने युद्धविरामबारे छलफल चलिरहेका बेला रूसको पछिल्लो प्रतिक्रिया आएको हो ।
