खेलकुद क्षेत्रको बजेट कम-मन्त्री चौधरी
काठमाडौँ । युवा तथा खेलकुदमन्त्री तेजुलाल चौधरीले नेपालमा खेलकुद क्षेत्रका लागि बजेट अपर्याप्त रहेको बताएका छन्। सानेपास्थित नेपाली काँग्रेसको केन्द्रीय कार्यालयमा खेलकुद विभागको आयोजनामा भएको कार्यक्रममा मन्त्री चौधरीले यो वर्ष पनि खेलकुद क्षेत्रमा पुरानै बजेटको निरन्तरता रहने संकेत गरे।
मन्त्री चौधरीका अनुसार चालू आर्थिक वर्षका लागि करिब साढे तीन अर्ब रुपैयाँ मात्र बजेट छुट्याइएको छ, जसमा धेरैजसो हिस्सा प्रशासनिक खर्चमा जाने बताइएको छ। उनले नेपालको खेलकुद पूर्वाधार तथा खेलाडी विकासका लागि बजेट वृद्धि गर्नुपर्ने आवश्यकता औंल्याए।
खेल पूर्वाधार निर्माणको पहल
मन्त्री चौधरीले कीर्तिपुरस्थित त्रिभुवन विश्वविद्यालय क्रिकेट मैदानको निर्माण कार्य वैशाख २४ गतेभित्र सम्पन्न हुने जानकारी दिए। साथै, खेलकुद पूर्वाधार निर्माणका लागि वैकल्पिक स्रोतको खोजी गर्नुपर्नेमा उनले जोड दिए।
उनले मादक पदार्थ तथा सुर्तिजन्य वस्तुहरूमा केही प्रतिशत कर लगाएर त्यसबाट प्राप्त रकम खेलकुद पूर्वाधार निर्माणमा लगाउनुपर्ने सुझाव दिए। यस्तो कर प्रणाली अतीतमा रहेको भन्दै उनले पुनः कार्यान्वयन गर्नुपर्ने धारणा व्यक्त गरे।
निजी क्षेत्रको सहयोग आवश्यक
मन्त्री चौधरीले निजी क्षेत्रको सामाजिक उत्तरदायित्वअन्तर्गत खेलकुद क्षेत्रलाई पनि प्राथमिकतामा राख्नुपर्ने बताए। उनले खेलाडीहरू तथा उनीहरूका छोराछोरीका लागि निजी विद्यालयहरू तयार रहेको दाबी गर्दै ‘खेल विद्यालय’ अवधारणालाई सातै प्रदेशमा कार्यान्वयन गर्ने योजना रहेको जानकारी दिए ।
उनका अनुसार विद्यालय तहदेखि नै खेलकुदलाई समावेश गरे नेपालको खेल क्षेत्र दिगो विकासतर्फ उन्मुख हुन सक्नेछ। खेलाडी उत्पादनका लागि विद्यालयस्तरबाटै कार्ययोजना बनाउनुपर्ने भन्दै उनले ग्रासरुट तहमा खेल विकासलाई सशक्त बनाउन सरकार प्रतिबद्ध रहेको बताए।
