धार्मिक आस्थासँग प्रविधिको संगम : दाङ धारपानी मन्दिरमा दानका लागि क्यूआर
दाङ । दाङकाे घाेराहीस्थित पाण्डवेश्वर महादेव मन्दिर धारपानी धाममा भक्तजनहरूले परम्परागत नगददानको झन्झट बेगर डिजिटल माध्यमबाट सहजै दान गर्न सक्ने भएका छन् ।
घोराही उपमहानगरपालिकाको सहयोगमा मन्दिरमा क्यूआर कोड जडान गरिएपछि श्रद्धालुहरूले मोबाइल स्क्यानमार्फत् दान गर्न सक्नेछन् साथै यो प्रविधिले मन्दिरको ऐतिहासिक, धार्मिक तथा पुरातात्विक जानकारी डिजिटल रूपमा उपलब्ध गराउनेछ।
धार्मिक आस्थासँग प्रविधिको संगम
मसोभिजन टेक्नोलोजी, काठमाडौँले विकसित गरेकाे ‘कहाँ’ एपको माध्यमबाट अब मन्दिरका गतिविधि, ऐतिहासिक तथ्य तथा धार्मिक महत्वबारे विस्तृत जानकारी सहजै प्राप्त गर्न सक्ने मन्दिर व्यवस्थापन समितिका सचिव विष्णुराम आचार्यले जानकारी दिए । उनका अनुसार मन्दिरमा पुगेका भक्तजनहरूले क्यूआर कोड स्क्यान गरी दान गर्न सक्नुका साथै, मन्दिरको सम्पूर्ण जानकारी आफ्नो मोबाइलमा हेर्न सक्नेछन् ।
धार्मिक स्थलहरूको डिजिटल प्रवर्धन
मन्दिर व्यवस्थापन समितिका अध्यक्ष गणेशकुमार अधिकारीले ‘कहाँ’ एप जडान भएपछि धारपानी मन्दिरको प्रवद्र्धनमा ठूलो मद्दत पुग्ने बताउँदै, यस अभियानलाई सफल बनाउन सहयोग गर्ने घोराही उपमहानगरपालिका र मसोभिजन टेक्नोलोजीलाई धन्यवाद ज्ञापन गरे।
डिजिटल प्रविधिको प्रयोगले भक्तजनहरूलाई सुरक्षित र पारदर्शी रूपमा दान गर्न मद्दत गर्ने उनकाे दाबी छ । धारपानी आउने भक्तजनले अब नगद बोकेर हिँड्नुपर्ने झन्झट समाप्त हुने अध्यक्ष अधिकारीकाे दावी छ । भक्तजनहरूलाई डिजिटल माध्यमबाट दान गर्न प्रेरित गर्न मन्दिरमा सचेतनामूलक कार्यक्रमहरू पनि सञ्चालन गरिने उनले बताए ।
