राजावादी र समाजवादी मोर्चाको जनप्रदर्शन : सुरक्षा सतर्कता बढाइयो
काठमाडौँ । राजतन्त्रवादी र समाजवादी मोर्चाले आज काठमाडौँमा अलग–अलग जनप्रदर्शन गर्दै छन् । दुई पक्षबीचको प्रदर्शनलाई मध्यनजर गर्दै सुरक्षा व्यवस्था कडा पारिएको छ ।
राजावादीहरू दिउँसोबाट काठमाडौँको तीनकुने क्षेत्रमा प्रदर्शन गर्दैछन्, भने भृकुटीमण्डपमा नेकपा (माओवादी केन्द्र), नेकपा (एकीकृत समाजवादी), नेत्रविक्रम चन्द नेतृत्वको नेपाल कम्युनिष्ट पार्टी र महिन्द्र राय यादव नेतृत्वको नेपाल समाजवादी पार्टी सम्मिलित समाजवादी मोर्चाले प्रदर्शन गर्न लागेको छ । दुवै पक्षले एक अर्काविरुद्ध प्रदर्शन गर्ने तयारी गरेका छन् ।
काठमाडौँ उपत्यकाभर सुरक्षा सतर्कता बढाइएको छ । त्रिपुरेश्वरदेखि रत्नपार्कतर्फ जाने सडक बिहानैदेखि बन्द गरिएको छ भने अन्य संवेदनशील क्षेत्रमा कडा सुरक्षा व्यवस्था अपनाइएको छ । प्रमुख स्थानहरूमा प्रहरीले चेकिङ मजबुत बनाएको छ ।
समाजवादी मोर्चाले आजको प्रदर्शनमा १ लाखभन्दा बढी मानिस उतार्ने दाबी गरेको छ । दुवै पक्षले यो जनप्रदर्शनलाई आफ्नो शक्ति प्रदर्शनका रूपमा लिएका छन् । प्रदर्शनलाई मध्यनजर गर्दै सुरक्षा निकाय उच्च सतर्कतामा छन् ।
