पत्रकार सुरेश रजकको हत्याविरुद्ध माइतीघरमा विरोध प्रदर्शन
काठमाडौँ । राजावादी प्रदर्शनका क्रममा हत्या गरिएका पत्रकार सुरेश रजकको हत्याविरुद्ध शनिबार नेपाल पत्रकार महासंघको नेतृत्वमा माईतीघर मण्डलामा विरोध प्रदर्शन गरिएको छ ।
पत्रकार महासंघसहित विभिन्न सञ्चारकर्मी संगठन तथा स्वतन्त्र पत्रकारहरूको उपस्थितिमा भएको प्रदर्शनमा पत्रकार रजकको निर्मम हत्याको विरोध गर्दै दोषीमाथि कडा कारबाहीको माग गरिएको छ।
शुक्रबार तीनकुनेमा भइरहेको राजावादी प्रदर्शनको समाचार संकलन गर्ने क्रममा भीडले पत्रकार रजकमाथि आक्रमण गरी आगो लगाएर हत्या गरेको थियो ।
यस घटनाप्रति गम्भीर असन्तोष व्यक्त गर्दै प्रदर्शनकारीहरूले ‘पत्रकारमाथिको हिंसात्मक आक्रमणको भर्त्सना गरौँ’, ‘पत्रकारको पेशागत सुरक्षाको ग्यारेन्टी गर’, ‘जोर्नालिजम इज नट अ क्राइम’, ‘पत्रकार सुरेश रजकका हत्यारालाई कारबाही गर’ तथा ‘प्रेस स्वतन्त्रताको ग्यारेन्टी गर’ जस्ता नारा लगाउँदै विरोध जनाए ।
प्रदर्शनमा सहभागी पत्रकारहरूले स्वतन्त्र पत्रकारिता सुनिश्चित गर्न तथा सञ्चारकर्मीहरूको सुरक्षा व्यवस्था कडा बनाउन आग्रह गरेका छन् ।
साथै, पत्रकार सुरेश रजकको हत्या कुनै पनि हालतमा स्वीकार्य नहुने भन्दै दोषीलाई कानुनी कठघरामा उभ्याउन सरकारले तत्काल कदम चाल्नुपर्नेमा जोड दिएका छन्।
