राप्ती गाउँपालिका र सामाजिक सुरक्षा कोषबीच समझदारी
दाङ । दाङको राप्ती गाउँपालिकाले सामाजिक सुरक्षा कोषसँग योगदानमा आधारित सामाजिक सुरक्षा योजना सञ्चालनका लागि समझदारी पत्रमा हस्ताक्षर गरेको छ ।
आइतबार काठमाडौँको थापाथलीस्थित सामाजिक सुरक्षा कोषको कार्यालयमा सम्पन्न हस्ताक्षर कार्यक्रममा गाउँपालिकाका अध्यक्ष प्रकाश विष्ट र कोषका निर्देशक डा. रोशन कोजुले समझदारी पत्रमा हस्ताक्षर गरेका हुन् ।
समझदारीअनुसार, राप्ती गाउँपालिकामा औपचारिक तथा अनौपचारिक क्षेत्रमा कार्यरत श्रमिकहरू तथा स्वरोजगार भएका नागरिकलाई सामाजिक सुरक्षा कोषमा आवद्ध गराइनेछ । यसले नागरिकको भविष्यमा आइपर्ने आर्थिक जोखिम न्यूनीकरण गर्न महत्वपूर्ण भूमिका खेल्ने गाउँपालिकाका अध्यक्ष विष्टले बताए ।
समाज कल्याणलाई दीर्घकालीन रूपमा सुदृढ बनाउन र नागरिकलाई सुरक्षित भविष्यको सुनिश्चितता दिन योगदानमा आधारित सामाजिक सुरक्षा योजना आवश्यक रहेको कोषका निर्देशक कोजुले बताए ।
उनका अनुसार, वर्तमान सामाजिक सुरक्षा वितरण प्रणालीलाई भविष्यमा राज्यको कोषले थेग्न नसक्ने सम्भावना रहेकाले नागरिकहरूको योगदानमा आधारित सुरक्षा प्रणालीलाई प्रोत्साहन गर्नुपर्ने आवश्यकता छ ।
यस सहकार्यबाट राप्ती गाउँपालिकाका स्थानीय नागरिकलाई सामाजिक सुरक्षा योजनामा सहभागी गराउन सहज हुने र दीर्घकालीन रूपमा सुरक्षित भविष्यको प्रत्याभूति गर्न सकिने अपेक्षा गरिएको छ ।
