कुलमान घिसिङलाई हटाएर सरकारले गल्ती गर्यो- महामन्त्री शर्मा
काठमाडौँ । नेपाली काँग्रेसका महामन्त्री विश्वप्रकाश शर्माले विद्युत कार्यकारी निर्देशक कुलमान घिसिङलाई हटाएर सरकारले गल्ती गरेको बताएका छन् ।
सोमवार प्रतिनिधि सभाको बैठकमा बोल्दै महामन्त्री शर्माले घिसिङलाई बाँकी समय काम गर्न दिनुपर्नेमा सरकारको निर्णय गलत भएको टिप्पणी गरे । उनले अदालतमा विचाराधीन विषयमा प्रधानमन्त्री केपी शर्मा ओलीले सदनमा जवाफ दिनु अनुपयुक्त भएको बताउँदै प्रश्न समेत उठाए ।
“सभामुख महोदय, कुलमान घिसिङलाई बाँकी समय काम गर्न दिनुपथ्र्यो। हामी पनि सत्तारूढको कित्ताबाट बोलिरहेका छौं। सरकारले हटाएर गल्ती गरेको छ। तर यो विषय अदालतको विचाराधीन भइसकेको हुँदा सदनमा छलफल गर्नु उपयुक्त हुँदैन,” शर्माले भने।
उनले सरकारको निर्णयप्रति आलोचना गर्दै भने, “प्रतिपक्षले समय माग्यो किन? सभामुखले समय दिनुभयो किन? प्रधानमन्त्रीले अदालतमा छलफलका क्रममा रहेका विषयमा जवाफ दिनुभयो किन?”
महामन्त्री शर्माले नागरिकको आवाजको सम्मान गर्दै लोकतान्त्रिक प्रणालीमा न्यायालयको निर्णय नै सर्वोपरि हुने धारणा राखे। उनले भने, “नागरिकले अदालतको फैसला चाहन्छन्। लोकतन्त्रमा अदालतको फैसला नै सर्वोपरी हुन्छ।”
गणतन्त्रको विकल्प राजतन्त्र हुन सक्दैन
महामन्त्री शर्माले फरक प्रसंगमा राजावादी समूहको तीनकुने घटनामा भएको धनजनको क्षतिप्रति दुःख व्यक्त गरे। तर उनले निर्मल निवास (पूर्वराजा ज्ञानेन्द्रको निवास) ले यस घटनाप्रति कुनै प्रतिक्रिया नजनाएको टिप्पणी गरे।
उनले लोकतान्त्रिक व्यवस्थामार्फत नै जनताको निराशा हटाउँदै जानुपर्ने बताए। “कुनै पनि हालतमा गणतन्त्रको विकल्प राजतन्त्र हुन सक्दैन। जनतामा रहेका निराशा लोकतान्त्रिक प्रक्रियाबाट समाधान गर्दै जानुपर्छ,” उनले स्पष्ट पारे।
शर्माको अभिव्यक्तिले कुलमान घिसिङको बर्खास्तीप्रति असन्तुष्टि मात्र नभई लोकतान्त्रिक व्यवस्थाको सुदृढिकरणमा कांग्रेसको अडानलाई पनि दर्शाएको छ ।
