लोकतन्त्रलाई सुदृढ बनाउन सर्भिसिङ आवश्यक-पूर्वमन्त्री शर्मा
काठमाडौँ । पूर्व सञ्चार तथा सूचना प्रविधि मन्त्री एवम् नेकपा (माओवादी केन्द्र) का सांसद रेखा शर्माले संविधान र वर्तमान व्यवस्थालाई बलियो बनाउन लोकतन्त्रको सर्भिसिङ आवश्यक रहेको बताएकी छिन् ।
सोमबार प्रतिनिधि सभाको बैठकमा बोल्दै उनले सुशासन कायम गर्न सके मात्र लोकतन्त्र सुदृढ हुने उल्लेख गरिन् । तर, उनले वर्तमान सरकार भ्रष्टाचार र बिचौलियाको पक्षमा काम गरिरहेको आरोप लगाउँदै लोकतन्त्र झनै कमजोर हुँदै गएको बताइन् ।
‘लोकतन्त्र बलियो बनाउन सुशासन आवश्यक’
सांसद शर्माले भनिन्, “संविधानलाई बलियो बनाउन, व्यवस्थालाई सुदृढ बनाउन लोकतन्त्रको सर्भिसिङ आवश्यक छ। त्यो भनेको सरकारको सुशासनका कामहरू हुन्। सरकारमा बसेर भ्रष्टाचार र बिचौलियाको पक्षमा काम गर्ने प्रवृत्तिले लोकतन्त्रलाई कमजोर बनाउँछ।”
उनका अनुसार सरकार सञ्चालनको क्रममा पारदर्शिता कायम गर्न र भ्रष्टाचार न्युनीकरण गर्न सके मात्रै लोकतान्त्रिक प्रणालीलाई सुदृढ बनाउनु संभव हुन्छ।
‘कुलमान घिसिङको बर्खास्तीबारे प्रधानमन्त्रीको जवाफ चित्तबुझ्दो छैन’
सांसद शर्माले कुलमान घिसिङलाई नेपाल विद्युत प्राधिकरणको कार्यकारी निर्देशकबाट हटाइएको विषयमा प्रधानमन्त्री केपी शर्मा ओलीले दिएको जवाफ चित्तबुझ्दो नभएको बताइन् ।
उनले सरकारको निर्णयप्रति खेद व्यक्त गर्दै सरकारलाई पारदर्शी र जवाफदेही बन्न आग्रह गरिन् । उनको अभिव्यक्तिले लोकतन्त्रको सुदृढिकरणका लागि सुशासन र पारदर्शिता अनिवार्य रहेको सन्देश दिन्छ ।
