प्रधानमन्त्री ओलीद्वारा पत्रकार सुरेश रजकको परिवारसँग भेट, न्यायको आश्वासन
काठमाडौँ । राजावादीहरुकाे आन्दाेलनकाे रिपाेर्टिङका क्रममा काठमाडौँको तीनकुनेमा जिउँदै जलाएर हत्या गरिएका पत्रकार सुरेश रजकको परिवारसँग प्रधानमन्त्री केपी शर्मा ओलीले बालुवाटारमा भेट गरेका छन् ।
भेटका क्रममा प्रधानमन्त्री ओलीले घटनाप्रति गहिरो दुःख व्यक्त गर्दै दोषीलाई कडा कारबाही गर्ने प्रतिबद्धता जनाएकाे प्रेस चाैतारी नेपालका अध्यक्ष गणेश पाण्डेले जानकारी दिए । प्रधानमन्त्री ओलीले अनुसन्धान प्रक्रिया तीव्र बनाई दोषीलाई कानुनी दायरामा ल्याइने बताएका थिए । साथै, सुरेश रजकको अन्त्येष्टि शीघ्र गर्न उनले परिवारजनलाई आग्रह गरेका थिए ।
प्रधानमन्त्री ओलीले सुरेशकी जीवन सङ्गिनी सुजन रजकलाई रोजगारीको व्यवस्था गरिने प्रतिबद्धता समेत व्यक्त गरेका थिए । उनले पीडित परिवारलाई सरकारले आवश्यक सहयोग गर्ने आश्वासन दिएका थिए ।
भेटवार्तामा सुरेशकी जीवन सङ्गिनी सुजन रजक, दाइहरू रमेश रजक र दिनेश रजकसहित परिवारका अन्य सदस्यहरू पनि सहभागी थिए । भेटघाट प्रेस चौतारी नेपालको समन्वयमा सम्पन्न भएको थियो ।
