एमाले दाङको मोटरसाइकल र्याली : जनताको बलिदानबाट प्राप्त गणतन्त्र रक्षा गर्न सबै जुट्नुपर्छ

दाङ । नेकपा (एमाले) ले गणतन्त्रको पक्षमा सोमबार देशभरका जिल्ला सदरमुकाम र प्रमुख शहरहरूमा जागरण सभा तथा मोटरसाइकल र्यालीको आयोजना गरेको छ ।

नेकपा (एमाले) दाङले तुलसीपुरमा बृहत मोटरसाइकल र्याली निकालेको छ । सो र्याली गणतन्त्रको पक्षमा जनचेतना अभिवृद्धि गर्न आयोजना गरिएको बताइएको छ । र्यालीका सहभागीहरूले “राजतन्त्र मुर्दावाद, गणतन्त्र जिन्दावाद”, “राजतन्त्र चाहिँदैन, गणतन्त्र मास्न पाइँदैन” जस्ता नारा लगाउँदै गणतन्त्रको संरक्षण र सुदृढीकरणमा आफ्नो प्रतिबद्धता व्यक्त गरेका थिए ।

एमाले पार्टी कार्यालय तुलसीपुरबाट सुरु भएको र्याली तुलसीपुर बजार परिक्रमा गरी वीपी चोकमा पुगेर सभामा परिणत भएको थियो । सभालाई सम्बोधन गर्दै एमाले पोलिटब्युरो सदस्य नरुलाल चौधरीले गणतन्त्र जनताको बलिदानबाट प्राप्त उपलब्धि भएको भन्दै यसको रक्षा गर्न सबै नागरिक सचेत हुनुपर्ने बताए । उनले भने, “जनताले ल्याएको गणतन्त्र जनताले नै जोगाउनुपर्छ । लोकतन्त्रलाई बलियो बनाउँदै गणतन्त्रलाई संस्थागत गर्दै लैजानु आजको आवश्यकता हो ।”

एमाले केन्द्रीय सदस्य तथा सांसद कोमल वलीले गणतन्त्रका आधारभूत मूल्य मान्यताहरूको रक्षा गर्न एमाले प्रतिबद्ध रहेको बताइन् । उनले भनिन्, “गणतन्त्रका लागि एमाले अग्रणी शक्तिको रूपमा अगाडि रहेको छ । हामी कुनै पनि हालतमा यसलाई कमजोर हुन दिँदैनौँ ।”

एमाले केन्द्रीय सदस्य कुमार दसौदीले पछिल्लो समय सामाजिक सञ्जालमा समेत राजावादी विचारधारा प्रसारित हुन थालेको भन्दै त्यसविरुद्ध सतर्क रहन आग्रह गरे । उनले भने, “सामाजिक सञ्जालमा राजतन्त्रको गुणगान गाउनेहरू सक्रिय छन् । तिनीहरूको नियत बुझेर लोकतान्त्रिक पक्षधरहरूले तर्कसहित उत्तर दिनुपर्छ ।”

केन्द्रीय सदस्य सीता सिग्देल न्यौपानेले पछिल्लो समय राजावादी मौलाउन थालेको भन्दै सबै सचेत हुनुपर्ने बताइन् । उनले भनिन्, “जनताले धेरै संघर्षपछि गणतन्त्र स्थापना गरेका हुन् । यसको रक्षा गर्न हामी सबै एकजुट हुनुपर्छ । अहिले विभिन्न शक्तिहरू गणतन्त्रविरोधी गतिविधिमा संलग्न छन्, तिनको पहिचान गरी लोकतान्त्रिक शक्तिहरूले सामना गर्नुपर्छ ।”

एमाले जिल्ला अध्यक्ष शिवकुमार आचार्यले नेपालमा गणतन्त्र स्थापनापछि देशले महत्वपूर्ण उपलब्धिहरू हासिल गरिसकेको उल्लेख गरे । उनले भने, “गणतन्त्रले देशमा स्थायित्व, समानता र समावेशी विकासलाई अगाडि बढाएको छ । यसको संस्थागत विकास गर्दै लैजान हामीले निरन्तर संघर्ष गर्नुपर्छ ।”

कार्यक्रममा एमाले जिल्ला उपाध्यक्ष मनोहर बुढाथोकी, सचिव श्याम डाँगीलगायतका नेताहरुले पूर्व राजा ज्ञानेन्द्र शाहको सुविधा कटौती गर्नुपर्ने बताए ।