संविधान त्रुटिपूर्ण छ, पुनःलेखन गर्नुपर्छ-अध्यक्ष यादव
भक्तपुर । जनता समाजवादी पार्टी, नेपालका अध्यक्ष उपेन्द्र यादवले नेपालको संविधान २०७२ त्रुटीपूर्ण रहेको भन्दै यसको पुनःलेखन गर्नुपर्ने आवश्यकता औंल्याएका छन् ।
सोमबार भक्तपुरमा आयोजित एक कार्यक्रममा बोल्दै अध्यक्ष यादवले नेपाली कांग्रेस र कम्युनिष्ट दलहरू संविधानप्रति प्रतिवद्ध नदेखिएका कारण व्यवस्थामाथि प्रहार भइरहेको बताए । उनका अनुसार, संविधानमा संघीय लोकतान्त्रिक गणतन्त्र उल्लेख गरिएको भए पनि यसको प्रभावकारी कार्यान्वयन हुन नसक्दा संविधानको स्थायित्व चुनौतीमा परेको छ।
अध्यक्ष यादवले सरकारले बलियो भएर मुलुकमा सुशासन कायम गर्न सक्दा मात्र व्यवस्थाको स्थायित्व सुनिश्चित हुने बताए । संघीयताको प्रभावकारी कार्यान्वयनका लागि प्रदेशहरूलाई अधिकार सम्पन्न बनाउन ढिलाइ गर्नु नहुनेमा उनले जोड दिए ।
उनले भने, “नेपाली कांग्रेस र कम्युनिष्ट दलहरूले संविधानप्रति प्रतिवद्धता देखाएका छैनन् । आफैंले ल्याएको संविधानमा संघीय लोकतान्त्रिक गणतन्त्र लेख्ने तर यसको कार्यान्वयन नगर्ने हो भने त्यो संविधान कसरी टिक्छ ? संविधान त्रुटीपूर्ण भएकाले यसलाई संशोधन गरी पुनःलेखन गर्नुपर्छ । संघीय लोकतान्त्रिक गणतन्त्रलाई बलियो बनाउन संविधान परिमार्जन आवश्यक छ । साथै, सरकार बलियो भई भ्रष्टाचार नियन्त्रण गर्न सकेमात्र जनताका चाहनाहरू पूरा गर्न सकिन्छ र व्यवस्थाको रक्षा हुन्छ ।”
अध्यक्ष यादवका अनुसार, संविधानले समावेशी राज्य व्यवस्थाको परिकल्पना गरे पनि राज्यका प्रमुख निकायहरूमा एउटै जातजातिको प्रभाव रहेको छ। यसले संविधानमा उल्लेखित समावेशी सिद्धान्तको प्रभावकारी कार्यान्वयन हुन नसकेको देखाउँछ ।
संविधान संशोधनमार्फत् संघीयता सुदृढ गर्दै जनताको आवश्यकता पूरा गर्नुपर्ने उनको धारणा छ । प्रदेशहरूलाई अधिकार सम्पन्न बनाउनु संघीयताको सार हो, त्यसैले सरकारले ढिलाइ गर्नु नहुने उनले बताए ।
