हिउँदे अधिवेशनले १३ विधेयक पारित गर्याे-सचिव भट्टराई

काठमाडौँ । नेकपा एमालेका सचिव योगेश भट्टराईले हिउँदे अधिवेशन विधायिकी हिसाबले सफल भएको दाबी गरेका छन् । मंगलबार संसद् भवन परिसरमा सञ्चारकर्मीसँग कुरा गर्दै उनले यो अधिवेशनमा १३ विधेयक पारित भएको र यो विगतको तुलनामा ठूलो उपलब्धि भएको बताए ।

“संसद् चल्न पाएको भए थप दुई विधेयक पनि पास हुन्थे,” उनले भने, “विधायिकी काममा आलोचनाको ठाउँ छैन ।” भट्टराईले सरकारले प्रस्तुत गरेका सशस्त्र प्रहरी र नेपाल प्रहरीसम्बन्धी ऐन, नागरिकता संशोधन विधेयक र नागरिक उड्डयन प्राधिकरणसम्बन्धी दुई विधेयकलाई महत्वपूर्ण कदमका रूपमा उल्लेख गरे ।

“यी विधेयक दशकौंदेखि बन्नुपर्छ भनिएका थिए, बल्ल आए,” उनले भने । आफू संस्कृति, पर्यटनमन्त्री हुँदा उड्डयन विधेयक राष्ट्रिय सभाबाट पारित गरेको उनले स्मरण गरे ।

समितिहरूको सक्रियताले यो सम्भव भएको भन्दै उनले प्रधानमन्त्रीले चारपटक संसद् सम्बोधन गरेको कुरालाई पनि जोड दिए। “यसले सरकारको संसद्प्रतिको सम्मान देखाउँछ,” उनले भने ।

समसामयिक राजनीतिक मुद्दामा छलफल भए पनि ०७९ पछि बनेको प्रतिनिधिसभामा परिपक्वता र सहिष्णुता कम देखिएको उनको टिप्पणी छ । चैत १९, २०८१ मा सम्पन्न यो अधिवेशनले विधायिकी दायित्वमा बलियो छाप छोडेको भट्टराईको भनाइ छ ।