सरकारी निर्णयको व्यवस्ता गर्दै निजी विद्यालयले अभिभावकसँग शुल्क माग्न थाल्यो
काठमाडौं, ७ असार ।
निजी विद्यालयका सञ्चालकहरूले लकडाउन अवधिको विद्यालयको शुल्क बुझाउन अभिभावकहरूलाई अनुरोध गरेका छन्। निजी विद्यालयहरुको छाता संगठन प्याब्सन र एनप्याब्सनले संयुक्त रूपमा विज्ञप्ति जारी गर्दै अभिभावकहरूलाई २०७६ को बाँकी रहेको शुल्क तथा २०७७ सालको शुल्क पनि भुक्तानी गर्न भनेका हुन्।
प्याब्सन अध्यक्ष टीकाराम पुरी र एन-प्याब्सन अध्यक्ष ऋतुराज सापकोटाले जारी गरेको विज्ञप्तिमा भनिएको छ, “२०७६ को बाँकी वक्यौता सम्भव भएसम्म चुक्ता गर्ने, २०७७ सालको विद्यालयमा बुझाउनुपर्ने शुल्क भुक्तानी गर्ने जस्ता आर्थिक गतिविधिमा सहभागी भई विद्यालयलाई अधिकतम सहयोग गरिदिनु हुन हार्दिक अपील गर्दछौं।”
लकडाउनले गर्दा विद्यालयको आम्दानी शून्य भएको, देशभरी करिब दुई लाख शिक्षक–कर्मचारीको जीवन यापन कठिन भएको, विद्यालयहरूले भाडा र ऋणको ब्याज तिर्न नसकेको भन्दै अभिभावकलाई शुल्क तिर्न अनुरोध गरेको अपिलमा लेखिएको छ ।
चैत ११ बाट जारी लकडाउनका कारण यति बेला विद्यालय बन्द छन्। सरकारले पनि अर्को सूचना जारी नहुँदासम्मका लागि कुनै पनि शुल्क लिन नपाउने भनि रहेको बेला निजी विद्यालयहरुले भने सार्वजनिक रुपमै शुल्क बुझाउन आव्हान गरेका हुन्।
