सरकारी कर्मचारीद्धारा नै नेपाल टेलिकमको सर्भर ह्याक, एक जना पक्राउ
काठमाडौं, साउन २ ।
नेपाल टेलिकमको सर्भर ह्याक गरेको आरोपमा एक व्यक्ति पक्राउ परेका छन् ।
टेलिकमको मोबाईल एप सर्भर सिस्टमभित्र पसेर नेपाल टेलिकमको प्याकेज प्रयोग गर्ने तथा बिक्री गरेको आरोपमा एक जनालाई नेपाल प्रहरीको केन्द्रीय अनुसन्धान ब्यूरोले पक्राउ गरेको हो ।
अनुसन्धानका क्रममा उक्त कार्यमा संलग्न सहरी विकास तथा भवन कार्यालय धनकुटामा कम्प्यूटर अपरेटर दिवाकर देउजा पक्राउ परेका हुन् ।
देउजाले नेपाल टेलिकमको प्याकेज बिक्री तथा प्रयोग गरेर नेपाल टेलिकमलाई क्षति पुराएको देखिएको छ । नेपाल टेलिकमले सर्भर ह्याकबाट कम्पनीको राजस्व तथा व्यावसायिक छविमा समेत गम्भीर क्षति पुगेको जनाएको छ ।
आफ्नो सर्भरभित्र पसेर हानी नोक्सानी पुराएको भन्दै कारबाही गर्न माग गरेको थियो । धनकुटाको पाख्रिवास नगरपालिका ५ का देउजाले डिजिटल ईन्टेलिजेन्सको माध्यमबाट नेपाल टेलिकमको सर्भरमा प्रवेश गरेर गैरकानूनी काम गर्दै आएको ब्यूरोले जनाएको छ ।
