कोरोना नियन्त्रणमा सरकारको काम अनुगमन गर्न सांसद श्रेष्ठको संयोजकत्वमा संसदीय उपसमिति गठन
काठमाडौं, ९ भदौ ।
संघीय संसदको शिक्षा तथा स्वास्थ्य समितिले कोरोना उपचार, रोकथाम तथा नियन्त्रण गर्न संघ, प्रदेश र स्थानीय सरकारले गरेका कामको अनुगमन गर्न उपसमिति गठन गरेको छ ।
आज बसेको समिति बैठकले तीनै तहका सरकारले गरेका कामको अनुगमन गर्न समिति सदस्य जीवनराम श्रेष्ठको संयोजकत्वमा ७ सदस्यीय उपसमिति गठन गरेको हो ।
सभापति जयपुरी घर्तीको स्वास्थ्य समस्याको कारण लामो समयपछि आज बसेको भर्चुअल बैठकले स्वास्थ्य मन्त्रालयका अधिकारीसँग छलफल गर्दै थप प्रभकारिताका लागि अनुगमन समिति गठन गरिएको हो ।
श्रेष्ठ संयोजकत्वको उपसमितिमा हित बहादुर तामाङ, शन्त थारु,सरिता न्यौपाने,नमिता चौधरी,एकवाल मिया,अन्जना बिशंखे सदस्य रहेका छन् ।
बैठकले कोरोना भाइरस नेपालमा बढदै गई रहेको अवस्थामा सम्भावित खतरा, उपचार ,रोकथाम र नियन्त्रण गर्नको लागि छलफल गरि सरकारलाई सुझाव र निर्देशनहरु दिएको छ ।
श्रेष्ठ संयोजकत्वको उपसमितिले कोभिड १९ को उपचार, रोकथाम तथा नियन्त्रण कार्यमा संघ, प्रदेश र स्थानीयका सरकारले गरेका काम कार्यहरु के कति प्रभावकारी भयो भनी अनुगमन तथा निरीक्षण गरि सरकारलाई सुझाव दिने समिति सभापति घर्तीले जानकारी दिईन् ।
