भारत-चीन तनाव: दुई देशका सेनाबीच लद्दाख सीमा क्षेत्रमा दोहोरो गोली हानाहान
काठमाडौं, २३ भदौ ।
भारत र चीनका सेनाबीच लद्दाखको सीमा क्षेत्रमा दोहोरो फायरिङ भएको छ ।
सन् १९७५ पछि भारत र चीनबीच सीमा क्षेत्रमा पहिलो पटक दोहोरो गोली हानाहान भएको छ । यसअघि पटक पटक झडप हुँदै आएको लद्दाखको प्याङगोँग ताल क्षेत्रमा दोहोरो फायरिङ भएको हो ।
भारतीय सेनाको भनाई उल्लेख गर्दै भारतीय मिडिया आजतकले लाइन अफ एक्चुअल कन्ट्रोल (एलएसी) मा पूर्वी लद्दाख क्षेत्रमा चीनले पहिले फायरिङ गरेको बताएको छ ।
जवाफमा भारतीय सेनाले पनि गोली प्रहार गरेको समाचारमा उल्लेख छ । चीनले भने भारतीय सेना एलएसी पार गरेपछि कारबाही गरेको स्पष्टिकरण दिएको छ ।
चीनको ग्लोबल टाइम्स पत्रिकाको अनलाईन सस्करणले भारतीय सेना गैरकानूनी ढंगले एलएसी पार गरेर सहमतिको गम्भीर उल्लंघन गरेको आरोप लगाएको छ ।
भारतीय सेनाले एलएसी पार गरेपछि बाध्य भएर गोली चलाएको चीनको प्रतिकृया रहेको समाचारमा उल्लेख छ । चीन वार्ता गर्न चाहेपनि भारतले कुनै प्रतिकृया नदिएको ग्लोबल टाइम्सले दाबी गरेको छ ।
चीनीयाँ सेनाका प्रवक्ता कर्णेल जांग शियूलीले भनेका छन्, “भारतीय सैनिकले भारत चीन सीमाको पश्चिम क्षेत्रमा एलएसी पार गरे र प्योंग त्सो तालको दक्षिणी किनाराको नजिक शेनपाओ पहाडको क्षेत्रमा घुसेका थिए ।”
उनले भारतको सैनिक भडकाव विरुद्ध कारबाही गरेको बताएका छन् ।
सम्बन्धित समाचार
- भारतीय सेना प्रमुखले लद्दाख पुगेर भने, ‘चीनसँग तनावपूर्ण स्थिति छ तर छलफल गरिरहेका छौं’
- भारत र चीनबीच पूर्वी लद्दाखको सीमा क्षेत्रमा फेरि तनाव, दुई देशका सेनाबीच झडप
- चिनियाँ सेनासँगको हिंसात्मक झडपमा २० भारतीय सैनिक मारिएको पुष्टि
