तिहारमा पुष्प व्यवसाय क्षेत्रमा झण्डै १० करोड रुपैयाँ बराबरको कारोबार हुने अनुमान
काठमाडौं,२५ कार्तिक ।
व्यवसायीहरुले आसन्न तिहारका लागि पुष्प व्यवसाय क्षेत्रमा झण्डै १० करोड रुपैयाँ बराबरको कारोबार हुने अनुमान गरेका छन् ।
पुष्प व्यवसायीहरुको संगठन फ्लोरीकल्चर एशोसियसन नेपाल(फ्यान)का अनुसार १० लाख सयपत्री ३ लाख मखमली र अन्य माला ५० हजार बराबरको माग हुन सक्ने छ ।
यसबाट झण्डै १० करोड रुपैयाँ बराबरको कारोबार हुने अनुमान गरिएको गठन फ्लोरीकल्चर एशोसियसन नेपालका अध्यक्ष कुमार कसजु श्रेष्ठले जानकारी दिए । कारोबारका हिसाबले अघिल्लो तिहारभन्दा झण्डै ५ करोड रुपैयाँ कम हो । फ्यानका अनुसार गत वर्षको तिहारमा २७ लाख मालाको कारोबार भएको थियो । कोरोनाका कारण यसवर्ष फूलको कारोबार घट्ने अनुमान छ ।
तिहारका लागि ३२ जिल्लामा ६ लाख भन्दा बढी विरुवाहरु उत्पादनमा रहेका छन् । यसपटक माग नेपाली उत्पादनले नै धान्ने अध्यक्ष कसजुको भनाई छ । फ्यानका अनुसार नेपालमा वार्षिक २ अर्ब २५ करोड रुपैयाँको कारोबार हुन्छ ।
जसमध्य आयात २६ करोड रुपैयाँको हुन्छ भने निर्याय जम्मा ५४ लाख रुपैयाँको मात्रै हुन्छ । फ्यानका अध्यक्ष कसजुले वार्षिक कारोबार ३ अर्ब रुपैयाँ पुराउने लक्ष्य रहेको बताए । नेपाल फूल उत्पादनमा आत्मनिर्भर उन्मुख रहेको भन्दै सरोकारवालाले थप अध्ययन अनुसन्धानमा जोड दिएका छन् ।
