राप्रपा छोडेर कांग्रेस प्रवेश गरेको ४ महिनामा सहमहामन्त्री बने सुनिल थापा
काठमाडौं, २८ कार्तिक ।
नेपाली कांग्रेसले राप्रपा छोडेर पार्टी प्रवेश गरेका सुनिल थापालाई सहमहामन्त्री बनाएको छ।
पार्टी केन्द्रीय कार्यालयमा शुक्रबार बसेको केन्द्रीय समिति बैठकले थापालाई सहमहामन्त्री बनाउने निर्णय गरेको हो । थापासँग कांग्रेस प्रवेश गरेका ६ जनालाई केन्द्रीय सदस्य बनाउने निर्णय समेत भएको छ ।
केन्द्रीय सदस्य हुनेमा रामप्रसाद भट्टराई, विष्णुविक्रम थापा, बाबुराम बस्नेत, वृजलाल यादव, किरण गिरी र टि.एन.योगी रहेका छन् । त्यस्तै दिलिप राई, आशाराम चौधरी र राजेशबहादुर सिंह आमन्त्रित केन्द्रीय सदस्य बनेका छन् ।
राष्ट्रिय प्रजातन्त्र पार्टीको पूर्वमहामन्त्री तथा उच्चस्तरीय कार्यसम्पादन समिति सदस्य रहेका थापासहित ३१ जनाले साउन १० गते पार्टी परित्यागको घोषणा गरेका थिए । राप्रपा परित्याग गरेको तीन दिनपछि थापासहितको समूह साउन १३ गते नेपाली कांग्रेसमा प्रवेश गरेको थियो ।
